Ońtústik Koreıa ushý-qoný jolaqtaryndaǵy beton bógetterdi alyp tastaıdy
ASTANA. KAZINFORM – Mundaı sheshim adam ólimine ákelgen ushaq apatynan keıin qabyldandy, dep habarlaıdy VVS.
Jeltoqsanda 179 adamnyń ómirin qıǵan ushaq apatynan keıin Ońtústik Koreıa eldegi 7 áýejaıda navıgatsııa úshin paıdalanylǵan beton konstrýktsııalaryn ózgertedi. Bul el tarıhynda eń kóp adam ólimine ákelgen apat boldy.
Ońtústik Koreıadaǵy barlyq áýejaı tekserilgennen keıin 7 áýejaıda ushý-qoný jolaǵyndaǵy qaýipsizdik aımaqtary da ıkemdeledi.
Apattyń sebebi ázirge belgisiz, biraq avıatsııalyq qaýipsizdik sarapshylary atalǵan qurylys bolmaǵan jaǵdaıda qaza bolǵandar sany áldeqaıda az bolýy múmkin ekenin aıtqan.
Beton konstrýktsııada ushaqtardyń qonýyna kómektesetin navıgatsııalyq júıe bar. Ońtústik Koreıanyń kólik mınıstrligi bul júıe eldegi jáne sheteldegi basqa áýejaılarda da bar ekenin málimdedi.
Qaýipsizdik ınspektorlary osyndaı 9 júıeni anyqtady. Olardyń arasynda Mýan áýejaıyndaǵy júıeler men eldegi ekinshi úlken áýejaı Chedjý halyqaralyq áýejaıy da bar.
Qazirgi ýaqytta beton negizdi jeńil qurylymdarǵa aýystyrý nemese ony jer astyna tóseý múmkindigi qarastyrylyp jatyr.
Sheneýnikter Mýan halyqaralyq áýejaıynda qoldanystaǵy beton bógetter tolyǵymen joıylatynyn atap ótti.