Ońtústik Koreıa úkimetindegi ózgeris: Prezıdenttiń mindetin atqarýshy taǵy aýysty

ASTANA. KAZINFORM – Ońtústik Koreıa prezıdenti mindeti atqarýshylarynyń osy aptada otstavkaǵa ketýi jańa kóshbasshynyń saılanýyna birneshe apta qalǵanda eldi saıası belgisizdiktiń jańa kezeńine ushyratty, dep habarlaıdy Yonhap. 

Jumadan bastap premer-mınıstrdiń orynbasary ári bilim mınıstri Lı Djý Ho Ońtústik Koreıa prezıdentiniń mindetin atqarýshy boldy. Burynǵy qarjy mınıstri Chhve San Mok beısenbi kúni keshke Ulttyq jınalystyń (parlament) ımpıchment jarııalaý áreketi aıasynda otstavkaǵa ketti.

Bastapqyda Chhve buǵan deıingi prezıdent m.a. jáne premer-mınıstr Han Dok Sý otstavkaǵa ketkennen keıin ýaqytsha kóshbasshy qyzmetin qaıta atqarýy tıis edi – kópshilik bul áreketti prezıdenttik saılaýǵa daıyndyq retinde qarastyrdy. 

Han óziniń kandıdatýrasyn juma kúni resmı túrde jarııalady.

Jańa prezıdent m.a. Lı Djý Honyń eldi bes aptadan az basqarý ýaqyty bar, bul mańyzdy saıası sheshimder qabyldaý úshin tym qysqa merzim. 

- Onyń qyzmet etý merzimi qysqa bolsa da, ótpeli kezeńde naqty bılik ortalyǵynyń joqtyǵy men basqarý múmkindiginiń shektelýi alańdaýshylyq týdyryp otyr, - dep jazdy agenttik.

Turaqsyz jaǵdaıdy Ońtústik Koreıanyń Donald Tramp ákimshiligi engizgen tarıfterge qatysty AQSh-pen mańyzdy saýda kelissózderin júrgizip jatqany qıyndatyp otyr. 

Lı resmı túrde qyzmetke kiriskennen keıin eldi turaqty basqarýǵa basa nazar aýdaratynyn atap ótti.

- Osy qıyn mindetti senip tapsyrǵany úshin jaýapkershilikti tereń sezinemin, - dedi ol tilshilerge. 

Ulttyq jınalystyń Chhve San Mokqa ımpıchment jarııalaý bastamasy parlamentti baqylaıtyn Demokratııalyq partııanyń (DP) saıası kek alý áreketi retinde qarastyrylyp otyr. Beısenbi kúni Joǵarǵy sot DP-nyń burynǵy jetekshisi jáne prezıdenttikke kandıdat Lı Chje Mendy saılaý zańnamasyn buzǵany úshin aqtaý úkimin toqtatty. 

Endi is qaıta qaraý úshin apellıatsııalyq sotqa qaıtarylady. 

Bul sheshim aldaǵy prezıdenttik básekede basymdyqqa sengen DP úshin úlken soqqy boldy. 

Han Dok Sýdyń kandıdatýrasy resmı túrde jarııalanǵan soń Halyq kúshi partııasy (HKP) úsh áleýetti úmitker – Han Dok Sý, HKP burynǵy jetekshisi Han Don Hýn jáne burynǵy eńbek mınıstri Kım Mýn Sý arasynda kandıdatty usynýdy qalaı úılestiretini belgisiz.

Konservatıvtik, sondaı-aq lıberaldyq úkimet tusynda qyzmet etkennen keıin beıtarap tulǵa beınesin saqtap qalǵan Han partııa ishinde ıÝn Sok Eldyń soǵys jaǵdaıyn engizý áreketinen týyndaǵan birneshe aılyq daǵdarystan keıin turaqtandyrýǵa qabiletti úmitkeri retinde qarastyrylyp otyr. 

- Men ózim jaqsy kóretin Koreıa Respýblıkasynyń bolashaǵy úshin jáne bárimiz úshin qolymnan keletin nárseni tabýdy sheshtim, - dedi ol Ulttyq jınalysta ótken baspasóz máslıhatynda óziniń kandıdatýrasyn resmı túrde jarııalaý kezinde. 

Buǵan deıin Ońtústik Koreıada prezıdenttik saılaý ótetin kún belgilengenin jazǵan bolatynbyz.