Ońtústik Koreıa úkimetinde iri kadrlyq ózgerister bolady
ASTANA. KAZINFORM — Ońtústik Koreıa prezıdenti Lı Chje Men alty mınıstrliktiń, sonyń ishinde Qorǵanys, Qarjy jáne Ádilet mınıstrlikteriniń basshylyǵyna kandıdattardy usyndy. Bul onyń qyzmetine kiriskeli beri úkimettegi alǵashqy aýqymdy kadrlyq ózgeris bolmaq, dep habarlaıdy Kazinform agenttigi TASS-qa silteme jasap.
Ońtústik Koreıa prezıdenti Lı Chje Men alty mınıstrliktiń basshylyǵyna kandıdattardy usyndy. Bul týraly prezıdent hatshylyǵynyń basshysy Kan Hýn Sık málimdedi.
Kadrlyq ózgerister Qarjy, Ádilet, Qorǵanys, Otbasy jáne genderlik teńdik, Memlekettik aýmaqtar jáne ınfraqurylym, sondaı-aq Shaǵyn, orta jáne venchýrlyq bıznes mınıstrlikterin qamtıdy.
Qorǵanys mınıstri qyzmetine Ońtústik Koreıa men AQSh Qarýly kúshteriniń birikken qolbasshylyǵy basshysynyń burynǵy orynbasary, qazirgi ýaqytta eldiń Saýd Arabııasyndaǵy elshisi qyzmetin atqaryp júrgen Kan Sın Chhol usynyldy.
Qarjy mınıstri qyzmetine qazirgi vedomstvo basshysynyń orynbasary Lı Hen Il kandıdat retinde usynyldy. Ádilet mınıstrligin bıliktegi partııanyń depýtaty Kım Syn Von basqarýy múmkin.
Memlekettik aýmaqtar jáne ınfraqurylym mınıstri qyzmetine qazirgi mınıstrdiń orynbasary Hon Chjı Son usynyldy. Otbasy jáne genderlik teńdik mınıstri qyzmetine Negizgi tabys partııasynyń depýtaty En He In, al Shaǵyn, orta jáne venchýrlyq bıznes mınıstri qyzmetine bıliktegi «Tobýro» partııasynyń depýtaty Lı So En usynyldy.
Taǵaıyndalmas buryn kandıdattar parlamentte tyńdaýdan ótýi kerek. Alaıda olardy bekitý úshin Ulttyq assambleıanyń kelisimi talap etilmeıdi.
Bul 2025 jylǵy maýsymda qyzmetine kirisken Lı Chje Men ákimshiligi kezindegi mınıstrler kabınetindegi alǵashqy iri kadrlyq aýys-túıis bolmaq.
Shilde aıynda Venchýrlyq bıznes mınıstri Han Son Sýk premer-mınıstr bolyp taǵaıyndalǵan. Bul qyzmetti atqarǵan Kım Mın Sok bıliktegi partııa tóraǵalyǵyna saılaýǵa túsý úshin qyzmetinen ketken. Tamyz aıynda prokýratýra reformasy aıasynda Ádilet mınıstri de otstavkaǵa ketken.
Eske salaıyq, buǵan deıin Qazaqstan azamattary 2028 jyldan bastap Ońtústik Koreıada resmı jumys isteı alatynyn habarlaǵan edik.
