Ońtústik Koreıa úkimeti halyqqa 110 dollardan taratady

ASTANA. KAZINFORM — Koreıa Respýblıkasynyń úkimeti ishki suranysty qoldaý baǵdarlamasy aıasynda eldiń barlyq azamatyna 150 000 vonnan (110 dollar) tóleý týraly sheshim qabyldady. Bul týraly Korea Herald habarlady. 

«Tutynýshy kýáligin» 21 shildeden 12 qyrkúıekke deıin alýǵa bolady. Kýpondar 30 qarashaǵa deıin jaramdy. 18 maýsymdaǵy jaǵdaı boıynsha Koreıa Respýblıkasynda turatyn barlyq azamat (shamamen 50 mıllıon adam) tólemdi ala alady.

Onyń mólsheri alýshynyń áleýmettik jaǵdaıyna baılanysty ózgeredi. Az qamtylǵan azamattar men tolyq emes otbasylar bir adamǵa 300 000 von (220 dollar) alady. Arnaıy baǵdarlama boıynsha memlekettik áleýmettik járdemaqy alatyn azamattar 400 000 von (293 dollar) alady. Aýyldyq jerlerdiń turǵyndary qosymsha 30 000 von (22 dollar), al erekshe mártebesi bar 84 mýnıtsıpalıtettiń turǵyndary qosymsha 50 000 von (36 dollar) alady.

Tólemderdi ótinish berýshilerdiń nesıelik jáne debettik kartalary, belgilengen shegi bar debettik kartalary nemese syılyq sertıfıkattary arqyly jasaýǵa bolady. Degenmen, qarajatty azamattar tek ózderi turatyn aýdanda jumsaı alady. 

Yonhap aqparat agenttiginiń habarlaýynsha, turaqty turýǵa ruqsaty barlar, koreı azamattarynyń jubaılary nemese bosqyndardan basqa sheteldikter eshqandaı tólem almaıdy.
Sondaı-aq 22 qyrkúıek pen 31 qazan aralyǵynda 100 000 von kólemindegi tólemderdiń ekinshi kezeńi josparlanýda, ol eń joǵary tabysy bar halyqtyń 10 paıyzyn qospaǵanda, azamattardyń 90 paıyzyna qoljetimdi bolady.

Eske sala keteıik, zertteýlerge qaraǵanda, Ońtústik Koreıa demografııalyq daǵdarys aldynda tur.