Ońtústik Koreıa turǵyndarynyń 90 paıyzdan astamy ıt etin jegisi kelmeıtinin aıtty

Ońtústik Koreıada 10 turǵynnyń 9-y ıt etin jegisi kelmeıtinin aıtty. Kazinform agenttigi bul týraly The Korea Herald basylymyna silteme jasap habarlaıdy. 

Janýarlardyń quqyǵyn qorǵaıtyn Aware tobynyń el boıynsha 2000 eresek adam arasynda júrgizgen saýalnamada respondentterdiń 93,4%-y ıt etin jeýge nıeti joq ekenin aıtty.

Sondaı-aq respondentterdiń 94,5%-y ótken jyly ıt jemegenin aıtty.

It etin jegisi kelmeýiniń sebebi týraly suraqqa 53,5%-y «emotsıonaldyq jıirkenish» sezinetinin, 18,4%-y ıtterdi ósirý men soıýdyń qatygezdik protsesimen kelispeıtinin, al taǵy 7,1%-y qoǵamnyń ıt etine teris kózqarasyn sezinetinin aıtty.

It etine tyıym salý týraly zań boıynsha jumys isteıtin komıtettiń deregine sáıkes, jyl saıyn eldegi 1600-ge jýyq meıramhana ortasha eseppen 388 myń ıt tutynady.

Dúısenbide el Parlamentiniń Zań shyǵarý jáne sot-quqyqtyq máseleler jónindegi komıteti ıt soıýǵa jáne ıt etin taratýǵa tyıym salatyn zań jobasyn maquldady, dep habarlaıdy Yonhap. 

Zań jobasy Ulttyq assambleıanyń plenarlyq otyrysynda búgin shyǵaryldy.