Ońtústik Koreıa telearnasynda Almatyda túsirilgen teleshoý kórsetiledi
ALMATY. KAZINFORM – 1 aqpanda Ońtústik Koreıadaǵy iri telearnalardyń biri – SBS arnasynda Almatyda túsirilgen teleshoýdyń arnaıy shyǵarylymy kórermenge jol tartady.
Baǵdarlama Seýl ýaqytymen 21:00-de (Almaty ýaqytymen 17:00) efırge shyǵady. Almaty ákimdigi atalǵan joba koreı televıdenıesindegi eń joǵary reıtıngige ıe baǵdarlamalardyń qatarynda ekenin atap ótti. Túsirilim Kóktóbe, Shymbulaq, Kók bazar jáne Kólsaı kólderinde bolǵan.
– Efır aldynda SBS arnasy jańa shyǵarylymnyń tızerin jarııalady. Onda tanymal koreı akterleriniń Almatynyń mádenıetimen, kórkem tabıǵatymen jáne týrıstik áleýetimen tanysqany beınelengen. Shoý qatysýshylary ulttyq taǵamdardan aýyz tıip, dástúrli kıim kıip kórip, túrli attraktsıondarǵa minip, sadaq atyp, qalanyń qysqy kelbetimen jáne Іle Alataýynyń ásem kórinisterin tamashalaıdy, - dep habarlady ákimdikten.
Eske salaıyq, buǵan deıin Ispanııanyń tanymal teleshoýy Almaty týraly telejoba jasady.