Ońtústik Koreıa Taıaý Shyǵystaǵy qaqtyǵysqa baılanysty janar-jaǵarmaı baǵasyna shekteý engizdi
ASTANA. KAZINFORM — Ońtústik Koreıa Taıaý Shyǵystaǵy jalǵasyp otyrǵan daǵdarys aıasynda jetkizilim máselelerine qaýiptenýine baılanysty shyǵyndardy azaıtýǵa kómektesý úshin 13 naýryzda janar-jaǵarmaı baǵasyna ýaqytsha shekteýler engizdi, dep habarlaıdy Kazinform.
Saýda, ónerkásip jáne resýrstar mınıstrliginiń málimetinshe, úkimet Ońtústik Koreıanyń munaı óńdeý zaýyttary janarmaı quıý stantsııalary men dıstrıbıýtorlaryna jetkizetin munaı ónimderine shekti baǵalar belgileıdi.
Vedomstvonyń habarlaýynsha, baǵa shegin aımaqqa, bıznes strategııasyna jáne janarmaı quıý stantsııalarynyń jumys tájirıbesine baılanysty aıtarlyqtaı ózgeretin janarmaı quıý stantsııalaryndaǵy otyn qunyna emes, munaı óńdeý zaýyttarynyń jetkizilimderine qatysty qoldaný týraly sheshim qabyldandy, dep habarlaıdy Yonhap.
— Úkimet munaı baǵasyn turaqtandyrý, baǵanyń shamadan tys ósýi sııaqty naryqtyq burmalanýlardy joıý jáne otyn baǵasynyń ósýiniń aýyrtpalyǵyn úkimet, bıznes jáne halyq arasynda bólisýdi qamtamasyz etý úshin munaı ónimderine baǵa shegin belgileý júıesin engizý týraly sheshim qabyldady, — dep málimdedi ónerkásip mınıstri Kım Chon Kvan.
Ol úkimettiń mundaı qıyn kezeńde naryqtyq tártipti buzatyn áreketterge jol bermeıtinin atap ótti.
Osylaısha, eń joǵary baǵa kádimgi benzın, dızel otyny jáne kerosın ónimderiniń jetkizilimine ortasha aptalyq baǵalaryn tıisti salyqtardy eskere otyryp túzetilgen Platts Singapore (MOPS) ındeksiniń mólsherlemesine kóbeıtý arqyly esepteledi. MOPS — Azııa-Tynyq muhıty aımaǵynda munaı ónimderiniń etalondyq baǵasy.
Bastapqy shekti baǵa kádimgi benzın úshin lıtrine 1724 von (1,17 AQSh dollary), dızel otyny úshin lıtrine 1713 von jáne kerosın maıy úshin lıtrine 1320 von deńgeıinde belgilenedi.
Eń joǵary shekti baǵa halyqaralyq munaı baǵasynyń ózgerýine baılanysty eki apta saıyn qaıta qaralady.
Bul Ońtústik Koreıa «Munaı bıznesi týraly» zań erejesin qoldana otyryp ekonomıkalyq turaqtylyqqa qaýip tóndiretin munaı baǵasynyń kúrt aýytqýy jaǵdaıynda ónerkásip mınıstrine eń joǵary satý baǵasyn belgileýge múmkindik berip otyrǵan 1997 jyldan beri alǵashqy jaǵdaı.
Taıaý Shyǵysta 28 aqpanda qaqtyǵys bastalǵaly Ońtústik Koreıada benzın baǵasy lıtrine keminde 200 vonǵa, al dızel otyny lıtrine keminde 300 vonǵa ósti.
Osyǵan deıin Japonııa Taıaý Shyǵystaǵy qaqtyǵysqa baılanysty munaıdyń strategııalyq qorlaryn bosatatyny habarlandy.
