Ońtústik Koreıa soty eks-birinshi hanymdy qamaýǵa alýǵa sanktsııa berdi

ASTANA. KAZINFORM – Seýldiń Ortalyq okrýgtik soty Ońtústik Koreıanyń burynǵy birinshi hanymy Kım Gon Hıdi sybaılas jemqorlyq kúdigimen qamaýǵa alýǵa sheshim qabyldady, dep habarlaıdy TASS. 

Arnaıy prokýror tobynyń málimetinshe, oǵan qymbat syılyqtar alý arqyly paraqorlyq, Deutsch Motors avtokólik dıleriniń baǵaly qaǵazdarymen alaıaqtyq jasaý jáne depýtattyqqa kandıdattardy irikteý protsesine aralasý boıynsha aıyptar taǵylyp otyr.

Burynǵy prezıdenttiń jaryna qatysty qamaýǵa alý orderi el tarıhynda alǵash ret berildi. Onyń jubaıy, eks-prezıdent ıÝn Sok El, 10 shildeden beri tergeý ızolıatorynda qamaýda otyr.

Arnaıy prokýrorlar Kım Gon Hıdi qamaýǵa alý týraly ótinishti dáleldegende aıǵaqtardy joıý qaýpin alǵa tartty. Al onyń qorǵaýshylary aıyptalýshynyń kinásin moıyndamaǵanyn jáne densaýlyq jaǵdaıynyń nashar ekenin aıtty. Seısenbide ótken tyńdaýlar shamamen tórt saǵatqa sozylyp, sheshimdi Kım Gon Hı Seýldiń tergeý ızolıatorynda kútken.

Prokýratýra bastapqyda ony jubaıy qamaýda otyrǵan Seýl tergeý ızolıatoryna ornalastyrýdy usynǵan, alaıda mekeme ákimshiligi eks-prezıdenttiń jubaıyn basqa ızolıatorǵa jiberýdi suraǵan.

Kım Gon Hıge barlyǵy 16 bap boıynsha aıyp taǵylyp otyr. Buǵan Deutsch Motors baǵaly qaǵazdarymen alaıaqtyq, qymbat syılyqtar túrindegi paraqorlyq jáne saılaý protsesine aralasý kúdigi kiredi.

Eske sala keteıik, Ońtústik Koreıanyń eks-prezıdenti qamaýda qala beretini týraly jazǵan edik.