Ońtústik Koreıa prezıdentiniń ushaǵyndaǵy 168 jolaýshynyń tólqujat deregi jelige tarady
ASTANA. KAZINFORM — Ońtústik Koreıa polıtsııasy prezıdent Lı Chje Men, onyń jubaıy, mınıstrler, jolaýshylar, jalpy 168 adamnyń jeke dereginiń ınternetke tarap ketýine qatysty aldyn ala tergeý bastady. Bul týraly Yonhap agenttigi habarlady.
Ulttyq polıtsııa agenttiginiń málimeti boıynsha, maýsym aıynda aqparattyq qaýipsizdikke qatysty aqyly saıtta «Jolaýshylar tizimi (Ońtústik Koreıa — Belgııa)» atty faıl jarııalanǵan.
Faılda prezıdent pen onyń jubaıy, úkimettiń joǵary laýazymdy sheneýnikteri, Prezıdenttiń atqarýshy keńsesiniń (Chhonvade) jáne Syrtqy ister mınıstrliginiń qyzmetkerleri, Prezıdenttiń qaýipsizdik qyzmetiniń músheleri jáne Chhonvade qyzmetinen habar taratatyn jýrnalısterdiń — jalpy 168 adamnyń jeke deregi bolǵan. Aqparatta koreı jáne aǵylshyn tilderindegi esimder, jumys oryndary, laýazymdary, týǵan kúnderi, tólqujat nómirleri, berilgen kúnderi jáne jaramdylyq merzimi qamtylǵan.
Faıl tabylǵan saıt paıdalanýshylarǵa faıldar men siltemelerdiń zııandy kodtary bar-joǵyn tekserýge múmkindik beredi. Aqyly jazylýshylar men basqa paıdalanýshylar platformaǵa júktelgen faıldardy júkteı alady.
Polıtsııa Lı Chje Mennyń maýsym aıynda Belgııaǵa, Italııaǵa jáne Frantsııaǵa saparlary kezinde prezıdent ushaǵyndaǵy jolaýshylardyń derekteri bar faılda zııandy baǵdarlamalar bar-joǵyn tekserý kezinde platformaǵa taralyp ketken dep kúdiktenedi.
Faıl 2 maýsymda, prezıdenttiń shetelge sapary aldynda júktelip, shamamen bes aı boıy turǵan. Qazir faıl jabyq.
Ońtústik Koreıa prezıdentiniń ákimshiligi aqparattyń tarap ketkeni belgili bolǵan kezde shuǵyl sharalar qabyldanǵanyn, ary qaraıǵy jumys Syrtqy ister mınıstrligi jáne basqa da tıisti mekemelerdiń qolynda ekenin málimdedi.
Buǵan deıin Ońtústik Koreıa prezıdenti polıtsııany túbegeıli reformalaýǵa shaqyrǵan bolatyn.
Ońtústik Koreıada quny 276 mln dollar bolatyn sýperkompıýter iske qosyldy.
