Ońtústik Koreıa prezıdenti polıtsııany túbegeıli reformalaýǵa shaqyrdy
ASTANA. KAZINFORM — Ońtústik Koreıa prezıdenti Lı Chje Men polıtsııa jumysyndaǵy kemshilikterdi joıyp, polıtsııa tergeýlerin tekseretin táýelsiz júıe qurý qajettigin aıtty, dep habarlaıdy Yonhap.
Prezıdent bul málimdemeni 21 qazanda ulttyq polıtsııanyń qurylǵanyna 81 jyl tolýyna arnalǵan saltanatty rásimde jasady.
Lı Chje Menniń aıtýynsha, quqyq qorǵaý organdary qoldanystaǵy jumys tásilderin qaıta qarap, olardyń tıimdi qyzmet etýine kedergi keltiretin júıeli kemshilikterdi joıýy kerek. Ol qoǵam polıtsııaǵa senip tapsyrǵan tergeý ókilettikteri ádil ári zań talaptary men jaýapkershilik qaǵıdattaryna qatań sáıkes júzege asyrylýǵa tıis ekenin atap ótti.
Prezıdent polıtsııa tergeýleriniń barysy men nátıjelerin syrtqy yqpaldan táýelsiz tekseretin tetik qurýdyń mańyzdylyǵyna erekshe nazar aýdardy.
Bul málimdeme prokýratýra júıesin reformalaý aıasynda aıtyldy. Reforma nátıjesinde polıtsııanyń tergeý júrgizý ókilettigi keńeıgen. Al prokýratýrada aıyp taǵý jáne sotta aıyptaýdy qoldaý mindetteri saqtalǵan.
Lı Chje Men atyshýly zorlyq-zombylyq qylmystarynyń birneshe ret tirkelýinen keıin qoǵamnyń polıtsııaǵa degen senimi tómendep bara jatqanyna alańdaýshylyq bildirdi.
Sondaı-aq ol quqyq qorǵaý organdaryn turǵyn úıdi jalǵa berý kezindegi alaıaqtyqpen jáne memlekettik sýbsıdııalardy zańsyz alýmen kúresti kúsheıtýge shaqyrdy. Sonymen birge azamattardyń negizgi quqyqtary men bostandyqtaryn qorǵaý qajettigin eske saldy.
Lı Chje Mennyń aıtýynsha, polıtsııaǵa degen qoǵamdyq senimdi naqty is-qımyldar men jumystyń nátıjesi arqyly ǵana qalpyna keltirýge bolady.
Buǵan deıin Ońtústik Koreıa úkimetinde iri kadrlyq ózgerister bolatyny týraly jazǵan bolatynbyz.
Sondaı-aq Ońtústik Koreıa 2027 jyldan bastap mınıstrlikterdi Seýlden kóshire bastaıdy.
