Ońtústik Koreıa prezıdenti KHDR-ǵa Koreı soǵysyn resmı túrde aıaqtaýdy usyndy
ASTANA. KAZINFORM — Ońtústik Koreıa prezıdenti Lı Chje Men KHDR-men Koreı soǵysyn resmı túrde aıaqtaý jóninde kelissózder bastaýǵa jáne Soltústik Koreıanyń ıadrolyq baǵdarlamasynyń damýyn tejeý sharalaryn talqylaýǵa úndedi. Bul týraly Kazinform agenttigi Yonhap-qa silteme jasap habarlady.
Ońtústik Koreıa kóshbasshysy bul usynysyn 15 tamyzda Koreıanyń japon otarlyq bıliginen azat etilgeniniń 81 jyldyǵyna arnalǵan saltanatty sharada aıtty.
— Bir-birimizge qaýip tóndirý nıetinen bas tartyp, soǵysqa tikeleı qatysqan taraptar retinde uzaqqa sozylǵan soǵysty toqtatý máselesin talqylaýdy bastaıyq. (…) Osy úderis barysynda Soltústiktiń ıadrolyq áleýetin damytýyn toqtatýdyń tıimdi joldaryn da talqylaı alamyz, — dedi Lı Chje Men.
Agenttiktiń habarlaýynsha, Ońtústik jáne Soltústik Koreıa áli de resmı túrde soǵys jaǵdaıynda. Sebebi 1950-1953 jyldardaǵy Koreı soǵysy beıbit kelisimmen emes, bitim týraly kelisimge qol qoıýmen aıaqtalǵan.
Ońtústik Koreıa prezıdenti qazirgi bitim júıesin Koreı túbegindegi tolyqqandy beıbitshilik rejımimen almastyrýǵa kúsh salatynyn málimdedi.
Lı Chje Men eki tarapty teketiresten bas tartýǵa úndedi.
— Ońtústik jáne Soltústik Koreıa beıbit qatar ómir súrý jáne ózara damý úshin kelissózder ústeline otyrady dep úmittenemin, — dedi ol.
Sonymen qatar Phenıan Seýldiń dıalogty qaıta bastaý jónindegi buǵan deıingi áreketterine ázirge jaýap bergen joq, dep atap ótti agenttik. Lı Chje Men ákimshiligi KHDR-men kelissózder júrgizýge umtylysyn jalǵastyratynyn málimdedi.
Sondaı-aq Ońtústik Koreıa prezıdenti túbektegi shıelenisti baqylaýǵa jáne daǵdarystardyń aldyn alýǵa múmkindik beretin «kópdeńgeıli qaýipsizdik júıesin» qurýdy qoldady. Onyń aıtýynsha, Koreı túbegindegi beıbitshilik búkil Soltústik-Shyǵys Azııadaǵy turaqtylyq pen yntymaqtastyqqa yqpal etýi múmkin.
Eske salaıyq, buǵan deıin Ońtústik Koreıa Prezıdenti Lı Chje Men Qazaqstan Prezıdenti Qasym-Jomart Toqaevqa jáne Qazaqstan Respýblıkasynyń Ulttyq qaýipsizdik komıtetine qylmystyq top múshelerin ustaý jáne olardy otanyna jedel qaıtarý isindegi yntymaqtastyq úshin alǵys bildirgenin jazǵanbyz.
