Ońtústik Koreıa prezıdenti KHDR-dyń saıası júıesin qurmetteýge ýáde berdi

ASTANA.KAZINFORM — Ońtústik Koreıa prezıdenti Lı Chje Men Soltústik Koreıanyń saıası júıesin qurmetteıtinin aıtyp, shıelenisti báseńdetý úshin 2018 jylǵy koreı aralyq áskerı kelisimdi qalpyna keltirý boıynsha sharalar qabyldaýǵa ýáde berdi, dep habarlaıdy Yonhap. 

Lı Azattyq kúnine oraı sóılegen sózinde Koreı túbegin ıadrolyq qarýsyzdandyrý týraly óz kózqarasyn bildirdi.

— Biz Soltústik Koreıanyń qazirgi júıesine qurmetpen qaraıtynymyzdy rastaımyz jáne dushpandyq áreketterge barý nıetimiz joq ekenin málimdeımiz, — dedi Lı saltanatty rásimde.

Biraq ol Soltústik Koreıa Koreı túbegindegi beıbitshilik úshin ıadrolyq qarýdan tolyq bas tartýy kerek degen senimin bildirdi.

Bir kún buryn Soltústik Koreıa kóshbasshysynyń ápkesi Kım E Chjon Phenıan Seýlmen qarym-qatynasty jaqsartqysy kelmeıtinin málimdedi.

Onyń aıtýynsha, ońtústikkoreıalyq BAQ málimdemelerine qaramastan, Soltústik Koreıa shekaralas aımaqtardaǵy daýys zoraıtqyshtardy bólshektemegen jáne muny istegisi kelmeıdi.

Buǵan deıin Ońtústik Koreıa shekara boıyndaǵy daýys zoraıtqyshtardy bólshekteýge kirisken bolatyn.