Ońtústik Koreıa Ormýz buǵazyna ásker jibermek
ASTANA. KAZINFORM — Strategııalyq mańyzy bar buǵazdaǵy keme joldarynyń qaýipsizdigi máselesi halyqaralyq deńgeıde talqylanyp jatyr, dep habarlaıdy Kazinform agenttiginiń Taıaý Shyǵystaǵy menshikti tilshisi.
Ońtústik Koreıa bıligi juma kúni Ormýz buǵazynda kemelerdiń erkin qatynaýyn qamtamasyz etý úshin áskerı shara qarastyryp otyrǵanyn rastady. Degenmen ásker jiberý týraly sheshim áli qabyldanǵan joq, dep habarlaıdy Reuters.
— Ońtústik Koreıa eger óziniń qorǵanys qabiletine nuqsan kelmese, buǵazdaǵy erkin keme qatynasyn qamtamasyz etý jónindegi jahandyq áreketterge áskerı kómek kórsetýi múmkin, — dep málimdedi Yonhap agenttigine bergen suhbatynda el prezıdenti ákimshiliginiń ókili.
Buryn Ońtústik Koreıa BAQ-tary Seýldiń 2026 jyldyń aıaǵyna deıin Taıaý Shyǵysqa áskerı kúsh jiberýge daıyndyqty bastap ketkenin, parlamenttiń ruqsatyn alý úshin qyrkúıek aıynda júginetinin jazǵan bolatyn. Al prezıdent ákimshiligi ásker jiberý týraly sheshim qabyldanǵany jaıly aqparattar «shyndyqqa janaspaıtynyn» málimdegen.
Birneshe nusqanyń ishinde P-8 Poseidon teńizdi patrýldeýshi ushaǵy, tyldy qamtamasyz etý kemeleri, mınalardy tabý jáne zalalsyzdandyrý bólimshelerin jiberý qarastyrylǵan.
— Áli eshqandaı sheshim qabyldanǵan joq, — degen prezıdent ákimshiliginiń ókili, ishki quqyqtyq protsedýralardy jáne Koreı túbegindegi áskerı daıyndyqty da eskerý qajettigin atap ótti.
Koreıada shetelge ásker jiberý máselesin aldymen Ulttyq qaýipsizdik keńesi qarap, ony Ońtústik Koreıa úkimeti men Ulttyq jınalysy (parlamenti) maquldaýy kerek.
Seýl AQSh, Ulybrıtanııa jáne Frantsııamen keme qatynasy qaýipsizdigine úles qosý múmkindigin talqylap jatyr. Prezıdent Lı Chje Men kelesi aptada Frantsııa prezıdenti Emmanýel Makronmen kezdesýde bul máseleni kóterýi múmkin.
Buǵan deıin Ońtústik Koreıa úkimeti Iran-AQSh soǵysy aıaqtalǵannan keıin ǵana buǵazǵa ásker ornalastyrýdy josparlap otyrǵanyn málimdegen bolatyn.
2025 jyly Ońtústik Koreıanyń shıki munaı ımportynyń 61%-y jáne munaı-hımııa ımportynyń 54%-y Ormýz buǵazy arqyly ótti.
Talqylaýlar AQSh prezıdenti Donald Tramptyń qysymy aıasynda ótip jatyr. Tamyz aıynda ol AQSh-Ońtústik Koreıa birlesken jattyǵýlarynyń qysqartylýynyń bir sebebi retinde Seýldiń Iranǵa qarsy soǵysta Vashıngtondy qoldaýdan bas tartýy ekenin atap kórsetken.
Buǵan deıin AQSh prezıdenti Ormýz buǵazyn «Tramp buǵazy» dep qaıta ataýdy usynǵanyn habarlaǵan edik.
Nurlan Tuıaqov
