Ońtústik Koreıa OLED tehnologııasyn damytýǵa 369 mlrd von ınvestıtsııa salady
ASTANA. KAZINFORM — Ońtústik Koreıa Qytaımen básekelestik aıasynda jańa býyn dıspleılerin ázirleýge shamamen 369 mlrd von baǵyttaıdy, dep habarlaıdy Aju News.
2027-2033 jyldar aralyǵynda Asan qalasynda ulttyq zertteý ortalyǵyn qurý josparlanyp otyr. Onda 20 tehnologııalyq joba boıynsha zertteý júrgiziledi.
Jańa ázirlemeler qatarynda keńeıtilgen shynaıylyq qurylǵylaryna arnalǵan asa joǵary ajyratymdylyqtaǵy ekrandar, bıometrııalyq datchıkteri bar dıspleıler jáne sozylmaly panelder bar. Sońǵylaryn adam tárizdi robottardyń jasandy terisi retinde paıdalanýǵa bolady.
Jańa platforma prototıpterdi synaqtan ótkizý merzimin 6 aıdan bir aıǵa deıin qysqartýǵa múmkindik beredi.
Investıtsııa Qytaı óndirýshileriniń básekelestigi kúsheıgen tusta qolǵa alynbaq. Sońǵy 5 jylda Samsung Display jáne LG Display kompanııalarynyń álemdik shaǵyn jáne orta ólshemdi OLED panelderi naryǵyndaǵy jıyntyq úlesi tabys kólemi boıynsha 85,5 paıyzdan 64 paıyzǵa deıin tómendegen.
Sonymen qatar Samsung Display jáne LG Display tehnologııalyq basymdyǵyn saqtap qalý maqsatynda OLED dıspleılerin óndirý qýatyn arttyrýǵa trıllıondaǵan von ınvestıtsııa salyp jatyr.
Buǵan deıin Azııa álemdik tehnologııa naryǵyndaǵy ornyn nyǵaıtyp keletinin jazǵan bolatynbyz.
