Ońtústik Koreıa mıllıondaǵan tutynýshynyń deregi taralýyna baılanysty Coupang-ǵa 400 mln dollar aıyppul saldy
ASTANA. KAZINFORM — Ońtústik Koreıanyń jeke aqparatty qorǵaý komıssııasy tutynýshylardyń derekterin jappaı buzǵan Coupang ınternet-dúkenine rekordtyq aıyppul saldy. Jalpy aıyppul kólemi 400 mıllıon dollardan asady, dep habarlaıdy VVS.
Ońtústik Koreıanyń retteýshi organy kıberqaýipsizdik talaptarynyń jetkiliksiz saqtalýy eldegi eń iri elektrondy saýda platformasy, jergilikti Amazon balamasy sanalatyn Coupang paıdalanýshylarynyń jeke derekteriniń taralýyna ákeldi dep esepteıdi.
Jeke aqparatty qorǵaý jónindegi komıssııa (PIPC) kompanııaǵa derbes derekterdiń taralýyna baılanysty 423,6 mlrd von, al paıdalanýshylardyń tıisti kelisiminsiz aqparat jınaǵany úshin taǵy 201 mlrd von kóleminde aıyppul saldy. Osylaısha, jalpy aıyppul kólemi 624 mlrd vonnan asyp, 400 mln dollardan joǵary boldy.
Retteýshiniń málimetinshe, oqıǵaǵa aqparattyq qaýipsizdik júıesindegi eleýli kemshilikter sebep bolǵan. Atap aıtqanda, aýtentıfıkatsııa kiltterin basqarý jáne qoljetimdilikti baqylaý tetikteri tıisti deńgeıde uıymdastyrylmaǵan.
Tergeý nátıjesinde derekterdiń taralýy shamamen 37,5 mln paıdalanýshy akkaýntyna áser etkeni anyqtaldy. Tutynýshylardyń aty-jóni, baılanys derekteri, jetkizý mekenjaılary jáne tapsyrys tarıhy jarııa bolǵan. Bul aıyppul Ońtústik Koreıa tarıhyndaǵy eń iri sanktsııa retinde tirkeldi.
Coupang kompanııasy bolǵan jaǵdaıǵa ókinish bildirip, qaýipsizdik sharalaryn kúsheıtýge nıetti ekenin málimdedi. Sonymen birge kompanııa komıssııa qorytyndysymen kelispeıtinin aıtyp, sheshimge shaǵym túsiretinin jetkizdi.
— Tutynýshylardyń alańdaýshylyǵyn túsinemiz jáne olardyń derekterin qorǵaý júıesin odan ári jetildirýdi jalǵastyramyz, — delingen kompanııa málimdemesinde.
Tergeý ótken jyldyń qarasha aıynda derekterdiń yqtımal taralýy týraly habarlamalardan keıin bastalǵan. Sol kezde kompanııa shamamen 4,5 myń akkaýntqa qatysty aqparattyń syrtqa shyqqanyn habarlaǵan edi. Alaıda keıingi ishki tekserýler oqıǵanyń aýqymy áldeqaıda keń bolýy múmkin ekenin kórsetti.
Kompanııa deregine sáıkes, kıbershabýyl jasaǵandar 34 mln-ǵa jýyq akkaýntqa qol jetkizýi múmkin bolǵan. Aldyn ala málimet boıynsha, shabýyl elden tys jerde ornalasqan server arqyly júzege asyrylǵan.
Oqıǵadan keıin kompanııanyń bas dırektory Pak De Chjýn qyzmetinen ketip, tutynýshylardan jarııa túrde keshirim surady. Kompanııanyń ýaqytsha basshysy bolyp ákimshilik dırektor Garold Rodjers taǵaıyndaldy.
Coupang tóńiregindegi bul jaǵdaı sońǵy jyldardaǵy Ońtústik Koreıadaǵy eń iri kıber oqıǵalardyń biri boldy. Buǵan deıin iri uıaly baılanys operatory SK Telecom-ǵa 20 mıllıonnan astam abonenttiń derekteri tarap ketken soń 100 mıllıon dollarǵa jýyq aıyppul salynǵan bolatyn.
Aıta keteıik, bıylǵy jyldyń alǵashqy úsh aıynda qazaqstandyqtarǵa 405 mln teńge kóleminde shyǵyn óteldi.
