Ońtústik Koreıa mektepterde smartfon qoldanýǵa tyıym salady
ASTANA. KAZINFORM — Ulttyq Assambleıa kelesi oqý jylynan bastap oqýshylardyń smartfondar men basqa da tsıfrlyq qurylǵylardy sabaq kezinde qoldanýyna shekteý qoıatyn jańartylǵan zań jobasyn maquldady, dep habarlaıdy Yonhap.
Mundaı sheshim smartfondardyń oqýshylarǵa keltiretin yqtımal zııanyna baılanysty qabyldandy.
Ońtústik Koreıa Bilim mınıstrliginiń málimdeýinshe, 1 naýryzdan bastap bastaýysh, orta jáne joǵary synyp oqýshylaryna sabaq kezinde smartfon men oǵan uqsas qurylǵylardy qoldanýǵa tyıym salynady.
Yonhap agenttiginiń habarlaýynsha, el bıligi jastardyń smartfonǵa táýeldi bolýyna qatysty alańdap, mektepterde olardy qoldanýdy shekteýge tyrysyp jatyr.
2023 jyldyń qyrkúıeginen bastap Bilim mınıstrligi sabaq kezinde smartfon men basqa da portatıvti qurylǵylardy qoldanýǵa shekteýler engize bastaǵan. Al jańa ózgerister osy shekteýlerge quqyqtyq negiz bolmaq.
Degenmen, tyıymǵa keıbir jaǵdaılarda ruqsat berilgen: múmkindigi shekteýli oqýshylar úshin, tótenshe jaǵdaılarda jáne bilim berý maqsatynda qoldanýǵa bolady.
Bul tyıym kúshine engennen keıin Ońtústik Koreıa mektepte smartfon men tsıfrlyq qurylǵylardy qoldanýǵa shekteý qoıǵan elderdiń qataryna qosylady.
Aıta keteıik, buǵan deıin 2025–2026 oqý jyldary Belgııanyń bastaýysh jáne orta mektepterinde de mobıldi telefon men basqa elektrondyq qurylǵylardy qoldanýǵa ulttyq deńgeıde tyıym salynatyny habarlanǵan bolatyn.