Ońtústik Koreıa kompanııasy BQO-ǵa 81 mlrd teńgeden astam ınvestıtsııa salýdy josparlap otyr
ASTANA. KAZINFORM - Astanada aǵymdaǵy máselelerdi talqylaý jáne perspektıvaly ınvestıtsııalyq strategııalardy qalyptastyrý úshin memlekettik organdar men halyqaralyq ınvestıtsııalyq qoǵamdastyqtyń basyn qosatyn jyl saıynǵy eń mańyzdy oqıǵalardyń biri – KGIR-2024 jahandyq ınvestıtsııa boıynsha qazaqstandyq dóńgelek ústel ótip jatyr.
Dóńgelek ústel QR Premer-mınıstri Oljas Bektenovtiń tóraǵalyǵymen ótýde. Oǵan memlekettik organdardyń birinshi basshylary, oblystar men qalalardyń ákimderi, transulttyq korporatsııalardyń basshylary, iri ınvestorlar, sarapshylar, sondaı-aq memlekettik qurylymdar men bıznes-qoǵamdastyqtardyń ókilderi qatysyp jatyr.
Bul is-sharanyń basty taqyryby jahandyq ınvestıtsııalyq úrdisterdi talqylaý jáne álemdik naryqtardyń bolashaǵyn boljaý boldy.
Batys Qazaqstan oblysynyń ákimi Narıman Tóreǵalıev ınvestıtsııa tartý jáne bızneske qolaıly jaǵdaı jasaý Memleket basshysy aıqyndaǵan negizgi basymdyqtar bolyp qala beretinin tilge tıek etti.
Ol búgingi dóńgelek ústel áleýetti ınvestorlarmen ózara árekettesý jáne óńirlerdiń ınvestıtsııalyq áleýetin kórsetý úshin biregeı múmkindik beretinin atap ótti.
«Batys Qazaqstan oblysynda biz ınvestorlar úshin barlyq qajetti jaǵdaılardy jasadyq: qolaıly klımat, damyǵan ınfraqurylym jáne qýatty ónerkásiptik jáne logıstıkalyq áleýet. Óńirde joǵary tehnologııalyq óndirister ashyldy, bul odan ári ósý úshin naqty ekonomıkalyq áleýet pen turaqtylyqty kórsetedi», - dep atap ótti Narıman Tóreǵalıev.
Onyń aıtýynsha, sońǵy úsh jylda oblystyń negizgi kapıtalyna quıylǵan ınvestıtsııa kólemi 1,6 trln teńgeni qurady, onyń ishinde 2023 jyldyń qorytyndysy boıynsha 645,6 mlrd teńge, bul aldyńǵy kórsetkishterden 16,4 paıyzǵa joǵary.
KGIR-2024 aıasyndaǵy mańyzdy oqıǵa BQO ákimdigi men ońtústikkoreıalyq Hyundai Solar KZ 777 kompanııasy arasynda memorandýmǵa qol qoıý boldy. Kompanııa tórt jobany júzege asyrýǵa 81,4 mlrd teńge ınvestıtsııalaýdy josparlap otyr, bul 120 jańa jumys ornyn qurýǵa múmkindik beredi. Josparlanǵan jobalardyń qatarynda qaldyqtardy óńdeý jáne órteý kesheni, jylyjaı kesheni, sondaı-aq kún panelderinen elektr qýatyn óndiretin stansanyń qurylysy bar. Bul bastamalardy iske asyrý merzimi 2024-2026 jyldarǵa josparlanǵan.
