Ońtústik Koreıa Qazaqstannan 18 mln barrel munaı satyp alýǵa kelisti

ASTANA. KAZINFORM – Ońtústik Koreıa Taıaý Shyǵystaǵy turaqsyzdyq aıasynda Qazaqstannan 18 mln barrel munaıdy balama baǵyttar arqyly satyp alýǵa kelisti, dep habarlaıdy Kazinform tilshisi.

Bul týraly Koreıa Respýblıkasy prezıdentiniń arnaıy ókili ári ákimshilik basshysy Kan Hýn Shık málimdedi.

Onyń aıtýynsha, Ońtústik Koreıa Qazaqstan, Oman, Saýd Arabııasy jáne Qatarmen 2026 jyldyń sońyna deıin 273 mln barrel munaı jetkizý týraly kelisim jasaǵan.

Atalǵan másele 8 sáýirde Qazaqstanǵa jasalǵan sapar barysynda talqylanǵan.

«Qazaqstanmen júrgizilgen kelissózder qorytyndysy boıynsha 18 mln barrel munaı jetkizý jóninde ýaǵdalastyqqa qol jetkizildi. Sonymen qatar eki el arasynda joǵary deńgeıdegi tikeleı ózara is-qımyldyń jańa arnasy quryldy», – dedi Kan Hýn Shık.

Sondaı-aq 2,1 mln tonnaǵa deıin jeńil munaı ónimin jetkizý kelisimi qamtamasyz etilgen.

Onyń sózinshe, satyp alynatyn munaı men jeńil munaı ónimi Ormýz buǵazy arqyly ótpeıtin balama baǵyttarmen tasymaldanady. Bul ishki naryqty turaqtandyrýǵa aıtarlyqtaı áser etedi dep kútilýde.

Ońtústik Koreıa Omannan shamamen 5 mln barrel munaı jáne 1,6 mln tonnaǵa deıin jeńil munaı ónimin ımporttaýdy josparlap otyr. Al Saýd Arabııasy 200 mln barrelge deıin munaı jáne keminde 500 myń tonna jeńil munaı ónimi jetkizedi.

Eske sala keteıik, 7 sáýirde Ońtústik Koreıa Ormýz buǵazyndaǵy geosaıası ahýaldyń shıelenisýine baılanysty munaı jetkizýdiń balama baǵyttaryn qarastyryp jatqany habarlanǵan edi.

8 sáýirde Memleket basshysy Qasym-Jomart Toqaev bul máseleni Kan Hýn Shıkpen talqylady.

Sol kúni Premer-Mınıstrdiń birinshi orynbasary Roman Sklıar koreıalyq delegatsııamen, onyń ishinde saýda, ónerkásip jáne resýrstar mınıstri Kım Chon Kvanmen kelissóz júrgizdi. Taraptar energetıka jáne ónerkásip salalaryndaǵy yntymaqtastyqty damytý máselelerin qarastyrdy.