Ońtústik Koreıa Qazaqstanmen birlesken zertteý ınstıtýtyn qurýǵa 16 mln dollar bóledi

ASTANA. KAZINFORM — Satbayev ýnıversıtetiniń ǵalymdary oılap tapqan ádispen alynǵan selenniń alǵashqy partııasynan 1,3 mlrd teńge tabys kelgen.

Bul jaıynda Ǵylym jáne joǵary bilim mınıstri Saıasat Nurbek Úkimet otyrysynda málim etti.

— Vakýýmdyq dıstıllıatsııa ádisimen selen óndirý jobasy týraly aqparatty ótkende taratqanbyz. Satbayev University-diń Metallýrgııa jáne ken baıytý ınstıtýty Balqashtaǵy «Qazaqmys Progress» kásipornymen birlesip, selendi tazartý ádistemesin engizdi. Tuńǵysh partııamyz 1,3 mlrd teńge tabyspen eksportqa shyqty, — dedi ol.

Mınıstr osy jetistikti ári qaraı jetildirý úshin Ońtústik Koreıamen birlesken ınstıtýtyn qurylatynyn atap ótti.

— Osy ınstıtýtymyz Ońtústik Koreıanyń Ulttyq sırek metaldar ınstıtýtymen birigip, arnaıy ǵylym ınstıtýtyn qurý týraly kelisimshartqa qol qoıdy. 16 mln dollar ınvestıtsııa salamyz dep josparlap otyr. Osy mamyr aıynda ashylý kerek. Biz bul máselelerdi pysyqtap, Joǵary ǵylymı-tehnıkalyq komıssııanyń qaraýyna shyǵaramyz, — dedi Saıasat Nurbek.

Mınıstrdiń aıtýynsha, eldegi 25,5 myń ǵalymnyń 54 paıyzy — 40 jastan asqandar.