Ońtústik Koreıa Qazaqstanǵa «aqyldy ferma» tehnologııasyn usynyp otyr
ASTANA. KAZINFORM — Memleket basshysy Qasym-Jomart Toqaev Qazaqstan-Koreı bıznes forýmynda eki eldiń aýyl sharýashylyǵyndaǵy baılanysy qalaı órbıtinin aıtty.
«Aýyl sharýashylyǵy salasyndaǵy áriptestikti nyǵaıtý mańyzdy. Qazaqstannyń agroónerkásip kesheni áýelden qýatty jáne bizdiń aýylsharýashylyq ónimder álemniń 80-nen astam eline eksporttalady», — dedi Qasym-Jomart Toqaev.
Memleket basshysy Qazaqstan agroónerkásip keshenin joǵary tehnologııalyq ındýstrııa retinde jańǵyrtýǵa nıetti ekenin atap ótti.
«Búgingi kelissóz barysynda Koreıa Respýblıkasynyń Prezıdenti Qazaqstandy „aqyldy aýylsharýashylyq fermalar“ qaǵıdasyna negizdelgen tehnologııamen qamtamasyz etý jóninde usynys jasady. Meniń oıymsha, bul — óte jaqsy usynys jáne biz osy jobany júzege asyrýmen aınalysamyz. Ońtústik Koreıanyń aýyl sharýashylyǵyndaǵy jasandy zeıinge, robot tehnıkasy men bıotehnologııaǵa negizdelgen ınnovatsııalyq tehnologııalaryn engizýge asa múddelimiz. Ásirese tıimdiligi joǵary, „aqyldy“ jylyjaı salý tájirıbesi bizdiń fermerlerdiń arasynda suranysqa ıe», — dedi Prezıdent.
