Ońtústik Koreıa qazaqstandyq munaıǵa úmit artyp otyr
ASTANA. KAZINFORM – Ońtústik Koreıa prezıdenti ákimshiliginiń basshysy Ormýz buǵazy arqyly keme qatynasyndaǵy úzilister jaǵdaıynda shıki munaı men nafta jetkizilimin qamtamasyz etý joldaryn talqylaý úshin Qazaqstan men Parsy shyǵanaǵy elderine saparlaıdy, dep habarlaıdy Yonhap aqparat agenttigi.
Prezıdent ákimshiliginiń basshysy Kan Hýn Sıktiń josparlanǵan sapary Ońtústik Koreıa úkimetiniń shıki munaı jetkizilimin qamtamasyz etý jónindegi kúsh-jigerimen baılanysty, sebebi Ormýz buǵazy arqyly qozǵalys is júzinde jabyq, al AQSh prezıdenti Donald Tramp Tegeran negizgi baǵytty ashpasa, Iran úshin saldary aýyr bolatynyn málimdedi.
Kan Hýn Sık prezıdenttiń arnaıy elshisi retinde Qazaqstan, Oman jáne Saýd Arabııasynda úkimettermen, energetıkalyq kompanııalarmen jáne keme operatorlarymen Ońtústik Koreıa porttaryna júk jetkizilimin qamtamasyz etý jáne medıtsınalyq ónimderdi qosa alǵanda mańyzdy taýarlardyń turaqty jetkizilimin saqtaý úshin kelissózder júrgizedi.
Ol úkimettiń basty basymdyǵy – mańyzdy taýarlardyń turaqty jetkizilimin qamtamasyz etý ekenin málimdep, Ońtústik Koreıanyń Taıaý Shyǵystan ımporttalatyn shıki munaı men naftaǵa áli qatty táýeldi bolyp otyrǵanyn atap ótti. Nafta – munaı-hımııa jáne ónerkásiptiń basqa da salalarynda keńinen qoldanylatyn negizgi shıkizat.
- Ótken aıda biz Birikken Arab Ámirlikterinen basymdyqpen 24 mln barrel shıki munaı alýǵa kelistik, shıki munaı men nafta Ońtústik Koreıa porttaryna jetkizilip otyr, - dedi Kang.
Kang Taıaý Shyǵys daǵdarysy tolyq rettelgenshe uzaq merzimdi jetkizilimderdi qamtamasyz etýge nazar aýdarý qajettiligin atap ótti. Budan basqa, prezıdenttiń ókili úkimet qazirgi ýaqytta Ormýz buǵazynda Ońtústik Koreıanyń týy bar 26 kemeniń qaýipsiz ótýin qamtamasyz etý úshin sharalar qabyldap, ekıpaj músheleriniń qaýipsizdigine basymdyq berip, keme kompanııalarynyń jaǵdaıyn eskerip jatqanyn málimdedi. Aqpan aıynyń sońynda AQSh pen Izraıldiń Iranǵa shabýyldary bastalǵannan beri kemeler buǵazda turyp qaldy.
Sońǵy aptalarda Ońtústik Koreıa shıki munaıdyń shamamen 70%-yn Taıaý Shyǵystan ımporttap otyrǵandyqtan energııa kózderin ártaraptandyrýǵa aıtarlyqtaı kúsh salyp keledi, bul eldi jetkizýdegi úzilister men baǵanyń kúrt aýytqýlaryna óte osal etip otyr.
Osyǵan deıin japondyq INPEX munaı-gaz kompanııasy Qazaqstan men Ázerbaıjan munaıynyń bir bóligin ishki naryqqa qaıta baǵyttaý múmkindigin qarastyryp otyrǵanyn habarladyq.