Ońtústik Koreıa qazaqstandyq CPC Blend curypty munaıyn satyp alýdy toqtatty

ASTANA. KAZINFORM – Ońtústik Koreıa qazaqstandyq munaıdy satyp almaıtyn boldy. Óıtkeni jergilikti iri munaı óńdeý zaýyttary jeńil azkúkirtti munaıdy satyp alý logıstıkasyn tym qymbat jáne Qyzyl teńizdegi hýsıtterdiń shabýyly aıasynda tıimsiz dep sanaıdy. Bul týraly Standard&Poors basylymy jazdy. 

CPC Blend munaıy Qara teńizdegi Novorossıısk portynan Sýets kanaly arqyly Ońtústik Koreıa porttaryna jetkizilip turatyn. Qyzyl teńiz arqyly logıstıkalyq qıyndyqtarǵa baılanysty aqpan aıynda birde bir partııa jetkizilgen joq, al tasymaldaý quny saqtandyrý syılyqaqylaryna baılanysty ósip ketti.

Ońtústik Koreıanyń iri munaı óńdeý zaýyttaryndaǵy derekkózderdiń málimetinshe, 2023 jyldyń sońynan bastap atalǵan elge baǵyttalǵan CPC Blend shıki munaı júkteri Sýets kanalyn aınalyp ótip, Úmit múıisine deıin uzaǵyraq joldan ótip jatyr. 

Ońtústik Koreıanyń iri munaı óńdeý kompanııasy SK Innovation jáne onyń kóliktik enshiles kásiporny SK Shipping kompanııasy qazaqstandyq CPC Blend munaıyn jetkizýge logıstıkalyq shyǵyndardyń kúrt óskenin atap ótti. Osyǵan baılanysty Seýlde ornalasqan Koreıa munaı qaýymdastyǵy sarapshylarynyń pikirinshe, munaı óńdeý zaýyttary bolashaqta CPC Blend shıki munaıyn satyp alýdy aıtarlyqtaı azaıtpaq. 

Eske salaıyq, Iemendegi hýsıt kóterilisshileri Irannyń qoldaýymen Palestına halqymen yntymaqtastyǵyn bildirip, Qyzyl teńizdegi saýda kemelerine shabýyl jasaı bastady. 

19 aqpanda Eýropalyq Odaq Qyzyl teńizdegi kemelerdi qorǵaý úshin Qyzyl teńizde «Aspides» operatsııasyn bastady. 

Buǵan deıin biz Qyzyl teńizdegi kemelerge shabýyl jasap, álemdik saýdany buzýshy hýsıtterdiń kim ekeni týraly jazǵan bolatynbyz.