Ońtústik Koreıa Qazaqstanda kólik oryndyǵy men astyq tasymaldaıtyn tehnıka shyǵarady
ASTANA. KAZINFORM — Qazaqstan men Ońtústik Koreıa ekonomıkanyń ártúrli salalarynda, sonyń ishinde avtomobıl ónerkásibi, medıtsına jáne metallýrgııa salasynda yntymaqtastyqty damytyp keledi. Osy oraıda eki eldiń bıznesmenderi aldaǵy ýaqytta qandaı birlesken jobalardy júzege asyratyny jaıynda derekterdi kópshilik nazaryna usynýdy jón kórdik.
Byltyrdyń qorytyndysy boıynsha Qazaqstannyń saýda seriktesteri arasynda, ıaǵnı Qytaı, Reseı jáne Italııadan keıingi tórtinshi orynda Ońtústik Koreıa turaqtady. Koreıa Qazaqstan taýarlarynyń eksportynda altynshy orynda, al ımport baǵytynda besinshi orynda.
Eki el ártúrli ónerkásip salalarynda belsendi yntymaqtastyqqa erekshe nazar aýdaryp otyr. Bul turǵyda negizgi salalardyń biri — avtomobıl ónerkásibi.
Hyundai Motor Company jáne Astana Motors jobasy otandyq avtomobıl ónerkásibin damytýdyń strategııalyq nysany sanalady.
Qazaqstan naryǵynda Hyundai markasynan basqa ońtústikkoreıalyq KIA markaly avtokólikter óndirisi qamtylǵan.
«2024 jyldyń sońyna deıin Almatyda avtomobıldiń quramdas bólikteri salasynda 2 jobany iske qosý josparlanǵan. ıAǵnı kólik oryndyqtary men elektrondy aýdıo-beıne jabdyqtar shyǵarý eskerilgen. 2025 jyly astyq tasıtyn tehnıka men basqa da júk kólikterin, tirkemelerdi shyǵaratyn tseh salý boıynsha taǵy bir jobany júzege asyrý qarastyrylǵan», — delingen Ónerkásip jáne qurylys mınıstrligi aqparatynda.
Sonymen qatar, metallýrgııa salasynda tehnologııalyq seriktes retinde ońtústikkoreıalyq kompanııanyń qatysýymen Pavlodar oblysynyń Ekibastuz qalasynda ferroqorytpa óndirisin iske qosý josparlanǵan.
Medıtsına salasynda 2024 jyldyń sońyna deıin Almatyda Samsung Medison júzege asyryp jatqan ýltradybystyq medıtsınalyq qural-jabdyqtar shyǵaratyn zaýyt ashý eskerilgen.
Munymen qosa, mınıstrlik ońtústikkoreıalyq Doosan kompanııasymen gaz jáne bý týrbınalaryn óndirý, sondaı-aq qazaqstandyq kompanııalardy oqytý ortalyǵyn qurý boıynsha kelissózdi jalǵastyryp jatyr.
Bul óz kezeginde energetıkalyq mashına jasaý salasynyń tıimdi damýyna tyń serpin beredi.
Sondaı-aq, koreıalyq OFE kompanııasy Almatydaǵy «Alataý» AEA aýmaǵynda lıftiler shyǵaratyn zaýyt salý múmkindigin qarastyryp otyr.
QR Ulttyq bankiniń derekterine qaraǵanda, 2005-2023 jyldar aralyǵynda Koreıa ınvestorlarynan Qazaqstanǵa tikeleı sheteldik ınvestıtsııalardyń jalpy aǵyny 9,6 mlrd AQSh dollaryna jetti.
Onyń ishinde 2023 jyly — 1,2 mlrd dollar, al 2022 jyly — 1,5 mlrd dollar boldy.
Eske salsaq, Samsung Qazaqstanda kir jýatyn máshıne, teledıdar shyǵarýy múmkin.
Budan buryn habarlanǵandaı, Memleket basshysy Qasym-Jomart Toqaevtyń shaqyrýymen bıylǵy 11-13 maýsym kúnderi Koreıa Respýblıkasynyń Prezıdenti ıÝn Sok El Qazaqstanǵa memlekettik saparmen keledi.
