Ońtústik Koreıa Qazaqstan ekonomıkasyna 12 mlrd dollardan astam ınvestıtsııa saldy
ASTANA. KAZINFORM — Qasym-Jomart Toqaev pen Lı Chje Meń keńeıtilgen quramda kelissóz júrgizdi. Bul týraly Aqordanyń baspasóz qyzmeti habarlady.
Prezıdent saýda-ekonomıkalyq baılanystardy jandandyrý perspektıvasyna toqtaldy.
– Qarym-qatynasymyzdyń ár salasynda jaqsy nátıjeler bar. Osy ýaqytqa deıin Koreıa Qazaqstan ekonomıkasyna12 mıllıard dollardan astam ınvestıtsııa saldy. Koreıanyń álemge tanymal kompanııalary Qazaqstan naryǵynda oıdaǵydaı jumys istep jatyr. Biz olarǵa barlyq jaǵdaıdy jasap otyrmyz. Keleshekte de solaı bolady, – dedi Qasym-Jomart Toqaev.
Prezıdenttiń aıtýynsha, eki eldiń mádenı-gýmanıtarlyq baılanysy da jyldan-jylǵa nyǵaıa túsýde.
– Byltyr Qazaqstanǵa 51 myńǵa jýyq koreı azamaty saparmen keldi. Buǵan eki memleket arasyndaǵy tikeleı áýe qatynasynyń qarqyndy damýy aıtarlyqtaı yqpal etýde. Aramyzda iri joba paıda boldy. Ol – Alataý qalasynyń qurylysy. Búgin biz Alataý qalasynda Koreıanyń KAIST ınstıtýtynyń fılıalyn ashý týraly kelisimge qol qoıamyz. Bul qadam bilim men ǵylym salasyndaǵy yntymaqtastyǵymyzdy tereńdetýge tyń serpin beredi dep oılaımyn, – dedi Memleket basshysy.
Prezıdent Astana men Seýldiń halyqaralyq arenadaǵy yqpaldastyǵyna joǵary baǵa berdi.
– Memleketterimizdiń jahandyq ornyqty damý jáne qaýipsizdikti qamtamasyz etý máselesine qatysty ustanymy – ortaq nemese uqsas, – dedi Qasym-Jomart Toqaev.
