Ońtústik Koreıa qarýly kúshteriniń sany alty jylda 110 myńǵa azaıdy

ASTANA. KAZINFORM —  Ońtústik Koreıanyń qarýly kúshteriniń turaqty quramy shamamen 450 myń adamǵa deıin qysqardy. Bul alty jyl burynǵydan 110 myńǵa az, dep habarlaıdy The Korea Times. 

Qorǵanys mınıstrligi men Qarýly kúshter kadrlyq basqarmasynan alynǵan derekterge súıensek, qysqartý aıasynda 17 dıvızııa men basqa da iri bólimsheler taratylǵan nemese biriktirilgen.

Statıstıkaǵa sáıkes, 2019 jyly 563 myń bolǵan ásker sany 2025 jyldyń shildesine qaraı qazirgi deńgeıge deıin tómendegen. Osy kezeńde 100 myńnan astam áskerı qyzmetker azaıǵan.

Vedomstvo ókilderi áskerge shaqyrylýshylar sanynyń qysqarýyna eldegi rekordtyq tómen týý deńgeıi basty sebep ekenin aıtady. Bul úrdis aldaǵy jyldary da kúsheıe túsedi dep boljanyp otyr. Ásker sanyn rettegenniń ózinde, demografııalyq jaǵdaı uzaq merzimdi perspektıvada jaýyngerlik daıyndyqty saqtaýǵa qıyndyq týǵyzatyny moıyndaldy.

Sannyń azaıýyn baıaýlatý úshin Qorǵanys mınıstrligi áıelderdi áskerge kóbirek tartý, qysqa merzimdi qyzmet úshin bonýstar berý, sondaı-aq erlerdiń beıbit kómekshi qyzmetterge jiberilýin azaıtý sııaqty sharalardy qarastyryp jatyr. Degenmen, keıbir belsendiler bul qadamdar qurylymdyq tapshylyqtyń ornyn toltyrýǵa jetkiliksiz dep sanaıdy.

Buǵan deıin Korean Peninsula Population Institute for Future deregine súıenip, eger eldegi demografııalyq quldyraý ózgerissiz jalǵassa, 2125 jylǵa qaraı Ońtústik Koreıa halqy qazirgi deńgeıdiń 15%-yna deıin azaıýy múmkin ekeni habarlanǵan edi. 

Aıta ketelik Ońtústik Koreıada sý tasqynynan qaza tapqandar sany 18 adamǵa jetken edi.