Ońtústik Koreıa ınvestorlary Alatau city jobasyn qalaı qabyldady
ASTANA. KAZINFORM — 15 qazan kúni Premer-mınıstrdiń orynbasary Qanat Bozymbaev Ońtústik Koreıadaǵy roýd-shoýda Alatau city jobasyn tanystyrdy. Osy oqıǵa Ońtústik Koreıanyń buqaralyq aqparat quraldarynda biraz rezonans týdyrdy.
Sırek metaldardan JI-ge deıin
Qanat Bozymbaev «Tańǵy jupar» elinde Alatau Rise with Kazakhstan forýmynyń ashylýyna qatysyp, áleýetti ınvestorlar aldynda Alataý qalasynyń jańa jobasyn tanystyrdy.
Alatau City-di Qazaqstan Úkimeti tehnologııalyq kompanııalar men eksportqa baǵyttalǵan óndiristerdiń bolashaq ortalyǵy retinde damytýǵa múddeli. Bul qala ınvestorlarǵa qanatty qoǵamdyq kólik, sýtegi ekonomıkasy sııaqty salalarda yntalandyrý baǵdarlamalaryn usynýǵa daıyn.
Qanat Bozymbaev forýmda sóılegen sózinde koreıalyq kompanııalarmen elektronıka, jańartylatyn energetıka, medıtsına, bilim berý jáne qala servısterin tsıfrlandyrý salalarynda yntymaq ornatýdyń áleýeti zor ekenin atap ótti.
Qazir Qazaqstanda 800-den astam koreı kompanııasy energetıka, qurylys, qarjy, densaýlyq saqtaý, avtomobıl ónerkásibi jáne joǵary tehnologııa salalarynda tabysty jumys istep jatqany da aıtyldy. 2024 jyly Koreıa Respýblıkasy Qazaqstannyń saýda seriktesteri arasynda 10-shy orynǵa, salǵan ınvestıtsııalar kólemi boıynsha 3-shi orynǵa shyqty.
— Biz birlesken jobalardy odan ári keńeıtip, ónerkásip jáne energetıka salalarynda koreıalyq kompanııalardy tartýǵa múddelimiz. Sizderdi Alatau city ulttyq jobasyna qatysýǵa shaqyramyz, — dedi Qanat Bozymbaev.
Vıtse-premer bastaǵan qazaqstandyq delegatsııa Ońtústik Koreıanyń zań shyǵarýshy, atqarýshy organdary men bıznes ókilderimen ekijaqty kezdesýler ótkizdi. Kelissózder aıasynda mańyzdy mıneraldy shıkizatty óndirý salasyndaǵy birlesken jumystan bastap jasandy ıntellektti damytýǵa deıingi baǵyttardyń keleshegi sóz boldy. Osy kezdesýlerdiń bárin Ońtústik Koreıadaǵy BAQ-tyń jan-jaqty jazyp jatqany ózara baılanysqa qyzyǵýshylyq bar ekenin kórsetse kerek.
Basty nazar ınnovatsııada
Ońtústik Koreıanyń The Financial News gazeti iri Qazaqstan delegatsııasynyń quramynda kelgen Úkimet ókilderimen birge iri bıznes ókilderin tizip turyp jazdy.
Bul materıalda Alatau City qalasyna ınvestıtsııa salatyn Ońtústik Koreıa kompanııalaryna qandaı múmkindikterdiń esigi ashylatyny tolyq baıandalǵan.
— Biz Koreıadan keletin barlyq ınnovatsııany quptaımyz, — dedi Qanat Bozymbaev AJU Press-ke bergen suhbatynda.
Sondaı-aq, ol jobaǵa AQSh pen Qytaıdan kapıtal tartylǵanyn aıtty.
Qanat Bozymbaev Alataýdy «krıpto-qala» dep sıpattady, onda blokcheın men tsıfrlyq qarjy kúndelikti ómirdiń bir bóligine aınalatynyn aıta kelip, sýtegi energetıkasy yntymaqtastyqtyń eń perspektıvaly baǵyty bolatynyn jetkizdi.
— Doosan usynatyn ınnovatsııalyq tehnologııalar Alataý qalasynda iske asyp, ásirese kógildir jáne jasyl sýtegi salasyn belsendi qamtıdy dep úmittenemiz, — dedi vıtse-premer.
AJU Press bul málimetterdi Qazaqstan Úkimeti Ońtústik Koreıanyń Samsung C& T, Hyundai E& C jáne Daewoo E& C sııaqty kompanııalaryn qala damýynyń bastapqy kezeńine tartýǵa nıetti ekenin aıtyp tolyqtyrady.
Órshil joba týraly batyl málimdeme
The Korea Times basylymy Qazaqstan Alatau City jobasynyń arqasynda Ortalyq Azııadaǵy ınnovatsııalar men tsıfrlyq qarjy ortalyǵyna aınalýǵa umtylyp jatqanyn jazdy.
«Men koreıalyq ınvestorlar men qonaqtardy osy ózara tıimdi yntymaqtastyqtyń bir bóligi bolýǵa shaqyramyn. Korea Times materıalynda Qanat Bozymbaevtyń osy sózi berildi.
— Alatau city jobasy — jańa sıpattaǵy qala ǵana emes, resýrstarǵa táýeldi ekonomıkadan ınnovatsııalar men tehnologııalarǵa negizdelgen ekonomıkaǵa kóshýdi kózdeıtin batyl ulttyq málimdeme, — deıdi Koreıa Demokratııalyq partııasynyń múshesi Pak Hon Gyn.
Seýl Alataýdy qoldaýǵa daıyn
Yonhap aqparat agenttigi jahandyq saýda boljap bolmaıtyn ózgeristerdi bastan keshirip jatqan kezde eki eldiń ekonomıkalyq yntymaqtastyqty nyǵaıtý joldaryn talqylaýy óte mańyzdy ekenin jazdy.
Koreıa tarapynan kelissóz júrgizgen jaýapty tulǵalardyń biri — Ónerkásip mınıstri Kım Chjon Gvan. Ol eki eldiń óndiris salasyndaǵy yntymaqtastyǵyn keńeıtýdi usynyp, Qazaqstandy ońtústik koreıalyq kompanııalardy qurylys jobalary men mańyzdy mıneraldardy jetkizý tizbegindegi tyǵyz yntymaqtastyqqa qatystyrýǵa úndedi.
KBS World-tyń jazǵanyna súıensek, Koreıa Qazaqstannyń Azııa men Eýropany baılanystyratyn halyqaralyq habqa aınalý josparyn qoldaý úshin jasandy ıntellekt salasyndaǵy ozyq tehnologııalar men analıtıkalyq bilim usyna alady.
Buǵan deıin Alatau City-di damytatyn jobalarǵa aqsha salǵan ınvestorlar 25 jylǵa salyqtan bosatylatynyn jazǵan edik.