Ońtústik Koreıa ınvestıtsııalyq baspanasy bar azamattarǵa talapty kúsheıtpek

ASTANA. KAZINFORM — Ońtústik Koreıa prezıdenti Lı Chje Men birneshe jyljymaıtyn múlki bar adamdar naryqtaǵy baǵa turaqtanǵan jaǵdaıda óz ınvestıtsııalary úshin jaýapkershilik pen táýekeldi ózderi kóterýi tıis ekenin málimdedi. Bul týraly Yonhap  agenttigi jazdy.

Prezıdent áleýmettik jelidegi X paraqshasynda baspana baǵasynyń ósýine qatysty boljamdy meńzep, maqalaǵa silteme jasaı otyryp, ásirese astana mańyndaǵy turǵyn úı naryǵyn turaqtandyrýǵa nıetti ekenin rastady.

Onyń aıtýynsha, halyq turǵyn úı naryǵynyń, ásirese astana aımaǵyndaǵy páter naryǵynyń, qalypty jaǵdaıda emes ekenin túsinedi jáne ony retteýge baǵyttalǵan sharalardy qoldaıdy.

Prezıdent úkimettiń naryqty turaqtandyrýǵa arnalǵan quraldary bar ekenin atap ótti. Olar:

• zańnamalyq retteý,

• salyq saıasaty,

• qarjylyq sharalar,

• turǵyn úı usynysyn arttyrý.

Basty másele — bıliktiń osy quraldardy qoldanýǵa erik-jigeri men batyldyǵynyń bolýy.

Lı Chje Men azamattardyń birneshe úı ıelenýine nemese ınvestıtsııalyq maqsatta jyljymaıtyn múlik satyp alýyna quqyǵy bar ekenin aıtty. Alaıda naryqtaǵy baǵa qalypqa kelgen jaǵdaıda olar ınvestıtsııaǵa baılanysty táýekelder men jaýapkershilikten qasha almaıtynyn eskertti.

Sondaı-aq prezıdent birneshe jyljymaıtyn múligi bar azamattardy mamyr aıynda aıaqtalatyn kapıtal ósimine salynatyn salyq boıynsha jeńildik merzimi bitkenge deıin artyq úılerin satýǵa shaqyrdy.

Budan bólek, ol mınıstrler kabınetin mundaı menshik ıeleri úshin nesıe merzimin uzartý jáne qaıta qarjylandyrý sharttaryn qaıta qarastyrýdy tapsyrdy.

Eske sala keteıik, buǵan deıin Ońtústik Koreıanyń burynǵy prezıdenti ómir boıy bas bostandyǵynan aıyrylǵanyn jazǵan edik.