Ońtústik Koreıa halqy kúrishti sırek tutynatyn boldy
ASTANA. KAZINFORM — Ońtústik Koreıada kúrish óndirisi 2026 jyly halyqtyń tamaqtaný ádetteriniń ózgerýi men egis alqaptarynyń qysqarýy aıasynda besinshi jyl qatarynan tómendedi. Osyǵan baılanysty kúrish egisiniń kólemi baqylaý tarıhyndaǵy eń tómengi deńgeıge jetti, dep habarlaıdy Kazinform Yonhap agenttigine silteme jasap.
Ońtústik Koreıa Statıstıka mınıstrliginiń málimetinshe, bıyl elde 3,5 mln tonna kúrish óndirilgen. Bul ótken jylmen salystyrǵanda 0,9 paıyz az. 1965 jyldan beri júrgizilip kele jatqan statıstıkada mundaı tómen nátıje tórtinshi ret tirkelip otyr.
Bıyl kúrish egilgen alqaptyń jalpy kólemi byltyrǵydan 1,1 paıyzǵa azaıyp, 670 myń gektardy qurady. Bul — baqylaý júrgizilgen búkil kezeńdegi eń tómengi kórsetkish.
Kúrish Ońtústik Koreıa halqynyń negizgi azyq-túligi sanalady. Alaıda sońǵy birneshe onjyldyqta turǵyndardyń tamaqtaný daǵdysy ózgerip, kúrish tutyný kólemi birtindep azaıǵan.
Úkimettiń kúrish egiletin alqap kólemin rettep, sharýalardy ózge daqyldardy ósirýge yntalandyrýy da ónim kóleminiń tómendeýine sebep boldy.
Buǵan deıin Qazaqstanda kúrish eksporty 25%-dan astam óskeni habarlanǵan bolatyn.
