Ońtústik Koreıa eksportynda JI salasyndaǵy saýdanyń arqasynda rekord ornady

ASTANA. KAZINFORM — Dúısenbi kúni jarııalanǵan Ońtústik Koreıanyń úkimettik derekteri boıynsha, jasandy ıntellekt salasyndaǵy sharyqtaýǵa baılanysty mıkroshemalar óndirisinde «sýpertsıkl» bastalǵan. Osylaısha, jartylaı ótkizgishterdi iri kólemde satýdyń nátıjesinde eldiń eksporty úshinshi toqsanda rekordtyq deńgeıge jetti, dep jazdy Yonhap.

Derekter jáne statıstıka mınıstrliginiń málimetinshe, shilde men qyrkúıek aralyǵynda eksport kólemi 185 mlrd AQSh dollaryn qurap, ótken jyldyń osy kezeńimen salystyrǵanda 6,5%-ǵa artqan. Bul mınıstrlik 2010 jyldan beri derekter jınaı bastaǵan ýaqyttan bergi eń joǵary toqsandyq kórsetkish.

Bul ósim sondaı-aq jyldyq esep boıynsha qatarynan ekinshi toqsanda eksporttyń ósip jatqanyn kórsetedi. Ekinshi toqsanda ósim 2,1 paıyzdy quraǵan edi.

«Ońtústik Koreıa men AQSh arasyndaǵy tarıfter boıynsha kelissózderdegi sheshilmegen máseleler úshinshi toqsanda eksportqa qysym jasaýy kútilgenimen, jartylaı ótkizgishterdiń kóp kólemde jetkizilýi eksporttyń jalpy ósimine ákeldi», dep habarlady mınıstrlik ókili.

Qazan aıynyń sońynda Seýl men Vashıngton Ońtústik Koreıanyń 350 mlrd dollar mólsherindegi ýádesine qatysty egjeı-tegjeıli kópten kútken kelisimdi aıaqtady. Bul ýáde AQSh-tyń baj salyǵyn tómendetý boıynsha Ońtústik Koreıa prezıdenti Lı Chje Men men AQSh prezıdenti Donald Tramptyń arasyndaǵy joǵary deńgeıdegi kelissózder barysynda berilgen.

Eske sala keteıik, AQSh pen Ońtústik Koreıa arasyndaǵy saýda kelisimi jasalmaýy múmkin ekenin habarlaǵanbyz.

Al oǵan deıin saýda tarıfin tómendetý úshin Ońtústik Koreıa AQSh-qa 350 mlrd dollar tóleıtini aıtylǵan.