Ońtústik Koreıa Donald Trampqa ejelgi altyn tájdiń kóshirmesin tabys etti
ASTANA. KAZINFORM – 29 qazanda Ońtústik Koreıa prezıdenti Lı Chje Men AQSh prezıdenti Donald Trampqa amerıkalyq kóshbasshynyń memlekettik saparynyń qurmetine ejelgi altyn tájdiń kóshirmesin jáne eń joǵary memlekettik marapatty tabys etti, dep habarlaıdy Yonhap aqparat agenttigi.
Chhonmachhon qabirinen tabylǵan altyn tájdiń kóshirmesi Trampty qarsy alý rásimi kezinde eldiń ońtústik-shyǵysyndaǵy attas qalada ornalasqan, Sılla patshalyǵynyń ejelgi astanasy bolǵan (b.z.d. 57 – b.z. 935 jj.) Kenchjý ulttyq murajaıynda tanystyryldy.
- Koreıa men Qurama Shtattar arasyndaǵy senim men seriktestiktiń qaıta jandanýy úshin, - dedi Lı Trampqa shyny vıtrınadaǵy tájdi tabystaý kezinde.
- Biz sizge osy altyn tájdi Kenchjýǵa memlekettik saparyńyzdyń qurmetine tabystaımyz, sebebi ol Koreı túbegine alǵashqy beıbitshilik ákelgen jáne koreı-amerıkalyq odaǵynyń jańa «altyn dáýirin» ashqan Sılla rýhyn bildiredi, - dep atap ótti syrtqy ister mınıstriniń hattama jónindegi orynbasary Kım The Chjın.
Ońtústik Koreıa kóshbasshysy sonymen qatar amerıkalyq áriptesine Koreı túbegindegi turaqtylyqty saqtaýǵa jáne beıbitshilikti nyǵaıtýǵa qosqan úlesi úshin eldiń eń joǵary memlekettik nagradasy - Mýgýnhvanyń Úlken ordenin tabys etti. Bul AQSh prezıdentiniń bul bedeldi marapatty alǵash ret alýy.
Óz kezeginde Donald Tramp Lı Chje Menge alǵys aıtyp, Ońtústik Koreıa men Qurama Shtattar arasyndaǵy qarym-qatynas «óte myqty» ekenin jáne «tipti nyǵaıa túsetinin» atap ótti.
Tamyz aıynda Vashıngtonda ótken kezdesý kezinde Ońtústik Koreıa kóshbasshysy Trampqa «tasbaqa keme» dep atalatyn dástúrli koreıalyq áskerı kemeniń modelin syıǵa tartty.
Buǵan deıin AQSh pen Ońtústik Koreıa arasyndaǵy saýda kelisimi jasalmaýy múmkin ekenin jazǵan bolatynbyz.
