Ońtústik Koreıa demografııalyq daǵdarys jaǵdaıynda áskerı kadrlyq saıasatyn ózgertedi
ASTANA. KAZINFORM — Ońtústik Koreıa áskeri 2028 jyldan bastap belgilengen talaptarǵa saı keletin barlyq serjanttar men starshınalarǵa uzaq merzimdi áskerı qyzmetke aýysýǵa múmkindik beretin reformany jarııalady, dep habarlaıdy Yonhap.
Bul shara serjanttyq laýazymdarǵa úmitkerler tapshylyǵy artyp kele jatqan jaǵdaıda áskerı qyzmettiń tartymdylyǵyn arttyrýǵa baǵyttalǵan.
Qarýly kúshterde mańyzdy ról atqaratyn serjanttyq quramdy jasaqtaý máselesi eldegi halyq sanynyń azaıýy men áskerge shaqyrylatyn jastar sanynyń qysqarýyna baılanysty kúrdelene tústi. Buǵan deıin keminde 7 jyldyq uzaq merzimdi kelisimshartqa úmitkerlerdiń shamamen 20%-y ǵana qol jetkizse, bıyl bul kórsetkish 50%-ǵa deıin ulǵaıtyldy. Al 2028 jyldan bastap sandyq shekteýlerdi tolyq alyp tastaý josparlanyp otyr.
Ótken jyly uzaq merzimdi qyzmet atqaratyn serjanttar sany shamamen 3 myńnan 3900 adamǵa deıin ósti.
Armııa ókilderiniń aıtýynsha, reforma jumyspen qamtý turaqtylyǵyn kúsheıtip, serjant mamandyǵyn jastar úshin tartymdy etýge baǵyttalǵan.
Sondaı-aq 2028 jylǵa qaraı shtab serjanttyń birinshi dárejeli serjant ataǵyn alý merzimi 6 jyldan 4 jylǵa deıin qysqartylady. Sonyń nátıjesinde qyzmettik joǵarylaý ýaqyty orta eseppen 4,3 jyldan 3,2 jylǵa deıin azaıady.
Áskerı vedomstvo serjanttardy zamanaýı tehnologııalarmen jumys isteýge daıyndaýdy da kúsheıtpek. Onyń ishinde pılotty jáne pılotsyz tehnıkanyń ózara is-qımyl júıeleri men jaýyngerlik drondardy basqarý da bar.
Buǵan qosa, áleýmettik jeńildikter keńeıtilip, aqshalaı qamtamasyz etý kólemi ulǵaıtylady. Atap aıtqanda, 2027 jylǵa qaraı shtab serjanttyń ortasha aılyq jalaqysy shamamen 3 mıllıon vonǵa (shamamen 1950 AQSh dollary) deıin ósedi.
Aıta keteıik, Germanııada árbir tórtinshi áskerı mindetti Qorǵanys mınıstrliginiń saýalnamasyn elemegen.
