Ońtústik Koreıa demografııalyq daǵdarys aldynda tur – jańa zertteý
ASTANA.KAZINFORM — Eger eldegi demografııalyq quldyraý ózgerissiz jalǵasa berse, 2125 jylǵa qaraı Ońtústik Koreıa halqy qazirgi deńgeıiniń nebary 15%-yna deıin azaıýy múmkin, dep habarlaıdy Kazinform agenttigi The Korea Herald basylymyna silteme jasap.
Jekemenshik zertteý ortalyǵy — Korean Peninsula Population Institute for Future usynǵan eń nashar stsenarııge sáıkes, Ońtústik Koreıa halqynyń sany 2125 jylǵa deıin 7,53 mıllıon adamǵa azaıyp ketý qaýpi tur. Bul qazirgi 51,68 mıllıon adammen salystyrǵanda óte úlken kórsetkish. Qazir Seýlde 9,3 mıllıonnan astam adam turady.
Eń ońtaıly boljam boıynsha da, halyq sany 15,73 mıllıon adamǵa deıin tómendeıdi — bul qazirgi kórsetkishtiń úshten birinen az.
Boljamǵa saı 75 jyldan keıin eńbekke jaramdy 100 adamǵa (15-ten 64 jasqa deıin) 65 jastan asqan 140 qart adam keletin bolady.
Qoǵamdyq kóńil-kúı de zertteldi
Esepte sonymen qatar 20-40 jas aralyǵyndaǵy adamdardyń neke men bala týý máselelerine qatysty pikirleri zertteldi. Bul taldaý Blind qosymshasyndaǵy shamamen 60 000 jarııalanym negizinde jasalǵan.
Zertteý nátıjesi boıynsha, qazirgi jastar úshin nekege turýdaǵy basty faktorlar — «aqsha» men «turǵyn úı», al «mahabbat» keıingi orynǵa yǵystyrylǵan.
Sondaı-aq, qarjylyq qıyndyqtar — bala týý týraly sheshim qabyldaýda eń jıi atalatyn sebep.
Baıandamada jastardyń otbasyn qurý jáne bala súıý týraly sheshimderi jeke qalaýy emes, kóbine ekonomıkalyq jaǵdaılarmen baılanysty ekeni aıtylǵan.
Usynylǵan sheshimder:
Instıtýt demografııalyq daǵdaryspen kúresý úshin birqatar sharalar usyndy:
• Bala týý men tárbıeleý shyǵyndaryn azaıtý úshin memlekettik qoldaýdy arttyrý
• Jumys pen jeke ómir arasyndaǵy tepe-teńdikti qalyptastyrý
• Zeınetkerlik jasty kóterý
• Qart adamdardyń úzdiksiz jumyspen qamtylýyn qoldaý
• Immıgratsııalyq saıasatty reformalaý
Bul boljamdar Ońtústik Koreıadaǵy demografııalyq daǵdarystyń qanshalyqty kúrdeli ekenin kórsetedi. El qazir álemdegi eń tómen týý kórsetkishterimen jáne halyqtyń jyldam qartaıýymen betpe-bet kelip otyr.
Aıta keteıik, 2024 jyly Ońtústik Koreıada 242 334 sábı dúnıege kelgen, bul 2015 jyldan bergi alǵashqy jyldyq ósim boldy.
Aıta keteıik, Ońtústik Koreıaǵa kelgen týrıster sany bıyl 20 mıllıonnan asqan.