Ońtústik Koreıa bala týý deńgeıi tómendeýine oraı ulttyq tótenshe jaǵdaı jarııalady

ASTANA. KAZINFORM — Koreıa Respýblıkasy halyq sanynyń azaıýyna baılanysty ulttyq tótenshe jaǵdaıǵa tap bolyp otyr jáne el bıligi bul qaýipti eńserý úshin keshendi sharalardy kúsheıtýde. Bul týraly el prezıdenti ıÝn Sok El málimdedi, dep habarlaıdy TASS.

«Búgin men resmı túrde ulttyq demografııalyq tótenshe jaǵdaı jarııalaımyn. Biz týý deńgeıiniń tómendigi máselesi sheshilgenshe jalpyulttyq keshendi áreket etý júıesin qoldanamyz», — dep keltiredi Yonhap agenttigi prezıdenttiń sózin.  

Agenttiktiń jazýynsha, el basshysy pessımıstik boljamdar aıasynda respýblıka halqy «úrdis ózgermese, aqyry qyrylyp qalýy múmkin» degen málimdeme jasady.

Sońǵy onjyldyqta el bıligi týý deńgeıin arttyrý úshin túrli yntalandyrý sharalaryn qoldandy, biraq turǵyn úıdiń joǵary baǵasy, bilim berý shyǵyndary jáne uzaq jumys ýaqyty sııaqty faktorlar azamattardyń otbasyn qurýǵa degen yntasyn tómendetip otyr, dep jazdy Yonhap.

Prezıdent saıasattyń úsh basym baǵytyn atady: ıkemdi jumys ýaqytyn engizý, bala kútimin qoldaý júıesin jetildirý jáne qoljetimdi baspanamen qamtamasyz etý.

Atap aıtqanda, bılik 2027 jylǵa qaraı (ıÝn Sok Eldiń prezıdenttik merzimi aıaqtalatyn jyl) bul quqyqty paıdalanatyn ata-analardyń úlesin qazirgi 7%-dan 50%-ǵa deıin ulǵaıtý maqsatymen dekrettik demalys erejelerin jumsartyp, ony ákelerge uzartýdy josparlap otyr. 

Jumys berýshilerge dekrettik demalystaǵy qyzmetkerlerdi aýystyrý úshin ýaqytsha jumysshylardy jaldaýǵa sýbsıdııalar beriledi.

Balaly otbasylar jeńildetilgen ıpotekalyq sharttar men keńeıtilgen salyq jeńildikterine ıe bolady, al qurylys kompanııalary jańa páter satý kezinde qazirgi 18 paıyzdyń ornyna jańa úı-jaıdyń 23 paıyzyn jas jubaılarǵa bólýge mindetti.

Sonymen qatar, salalyq mınıstrlik qurylady, ol ázirge «Demografııalyq strategııany josparlaý mınıstrligi» atalyp otyr. 

Vedomstvo demografııalyq problemalardy, sonyń ishinde týý deńgeıiniń tómendigin, qarttar jáne kóshi-qon saıasatyn jeńý strategııalaryn ázirleıdi.