Ońtústik Koreıa atomdyq súńgýir qaıyqtar jasaý josparyn maquldady
ASTANA. KAZINFORM — Ońtústik Koreıa AQSh-pen jasalǵan kelisim aıasynda atomdyq súńgýir qaıyqtar jasaý jónindegi negizgi jospardy bekitti. Jobany iske asyrý jumystary 2027 jyly bastalady. Bul týraly Yonhap agenttigi jazdy.
Ońtústik Koreıanyń Qorǵanys salasyndaǵy satyp alýlar basqarmasynyń (DAPA) málimetinshe, tıisti sheshim 6 qarashada Ulttyq qorǵanys mınıstrligi janyndaǵy qorǵanys jobalaryn qaraý komıtetiniń otyrysynda qabyldanǵan.
Jang Bogo N dep atalatyn joba aıasynda Ońtústik Koreıada atomdyq energetıkalyq qondyrǵymen jabdyqtalǵan, kádimgi qarý-jaraqpen jaraqtandyrylatyn súńgýir qaıyqtardy ázirleý jáne qurastyrý kózdelip otyr.
Alǵashqy súńgýir qaıyqty 2030 jyldardyń ortasynda sýǵa túsirý josparlanǵan. Ony qarýly kúshterdiń quramyna engizý 2030 jyldardyń ekinshi jartysynda nemese odan keıingi kezeńde júzege asýy múmkin.
2027 jyldyń birinshi jartysynda jobaǵa jaýapty óndirýshi ashyq konkýrs arqyly tańdalady. Al jyl sońyna deıin tıisti kelisimshart jasasý josparlanyp otyr. Jobany júzege asyrýdy jedeldetý maqsatynda ony ekonomıkalyq tıimdilikke aldyn ala baǵalaý rásiminen bosatý týraly sheshim qabyldanǵan.
Súńgýir qaıyqtardy jabdyqtaý úshin shaǵyn modýldik ıadrolyq reaktorlardy paıdalaný kózdelgen. AQSh bul reaktorlarda ýran-235 ızotopynyń baıytylý deńgeıi 20 paıyzdan tómen bolatyn tómen baıytylǵan ýrandy qoldanýǵa kelisim bergen.
DAPA málimetinshe, bul baǵdarlama KHDR tarapynan tónetin ıadrolyq jáne zymyrandyq qaterler jaǵdaıynda eldiń qorǵanys qabiletin nyǵaıtýǵa baǵyttalǵan.
Jobanyń túpkilikti bıýdjeti ázirge bekitilgen joq. Buqaralyq aqparat quraldarynyń habarlaýynsha, Ońtústik Koreıa árqaısysynyń sý yǵystyrǵysh kólemi shamamen 8 myń tonna bolatyn keminde úsh atomdyq súńgýir qaıyq salýdy qarastyryp otyr.
Baǵdarlamanyń jalpy quny 28,9 trln vonǵa (shamamen 21,3 mlrd AQSh dollary) baǵalanyp otyr.
Buǵan deıin Atom energııasy jónindegi halyqaralyq agenttiktiń (MAGATE) bas dırektory Rafael Grossı Ońtústik Koreıany atomdyq súńgýir qaıyqtar jasaý baǵdarlamasyn iske asyrý barysynda ıadrolyq qarýdyń taralýyna jol bermeý maqsatynda agenttikpen tyǵyz yntymaqtastyq ornatýǵa shaqyrǵan bolatyn.
Buǵan deıin Soltústik Koreıa taǵy da jańa zymyran ushyrǵanyn jazdyq.
