Ońtústik Koreıa Álemdik jáne dástúrli dinder lıderleriniń VIII Sezine qatysady

ASTANA. KAZINFORM — Qazaqstannyń Ońtústik Koreıadaǵy elshisi Nurǵalı Arystanov koreı býddızmi «Chogıe» ordeniniń prezıdenti Djın Výmen kezdesti. Bul týraly SІM baspasóz qyzmeti habarlady.

Kezdesý barysynda taraptar konfessııaaralyq dıalogty, toleranttylyqty jáne beıbit birge ómir súrýdi ilgeriletý máselelerin talqylady. Osy oraıda qazaq dıplomaty Djın Výge Parlament Senatynyń tóraǵasy Máýlen Áshimbaevtyń 2025 jylǵy qyrkúıekte Astanada ótetin Álemdik jáne dástúrli dinder lıderleriniń VIII sezine resmı shaqyrýyn tabys etti.

Sezdiń órkenıetter, mádenıetter men dinder arasyndaǵy jahandyq dıalogty ilgeriletýdegi mańyzdylyǵy, sondaı-aq dinı qaýymdar arasyndaǵy ózara túsinistik pen qurmetti nyǵaıtýdaǵy róli atalyp ótti. Sonymen qatar Sez jumysyna «Chogıe» ordeniniń belsendi qatysýy joǵary baǵalanyp, bul Qazaqstan men Ońtústik Koreıa arasyndaǵy mádenı-gýmanıtarlyq yntymaqtastyqtyń damýyna úles qosatyny aıtyldy.

Prezıdent Djın Vý shaqyrýdy rızashylyqpen qabyldap, koreı tarapynyń Sezge qatysýǵa nıetti ekenin bildirdi. Sondaı-aq ol bul alańnyń rýhanı lıderlerdiń ózara is-qımyly men beıbitshilik pen kelisimdi ilgeriletý úshin mańyzdy platforma ekenin tilge tıek etti.

Kezdesý barysynda Djın Vý Qazaqstan Úkimeti men halqyna elde turyp jatqan etnıkalyq koreılerge kórsetken qoldaýy úshin alǵys aıtyp, olardyń eki dostas el arasyndaǵy «altyn kópir» retindegi mańyzdy rólin basa aıtty. Sondaı-aq eki memleket azamattary arasyndaǵy tikeleı baılanystardyń artýyna yqpal etetin áýe qatynasynyń keńeıýi arqyly ekijaqty yntymaqtastyqtyń qarqyndy damyp kele jatqany aıtyldy.

Aıta ketelik Dımash Qudaıbergen Dinder seziniń Іzgi nıet elshisi bolyp taǵaıyndalǵan edi.