Ońtústik Koreıa, AQSh jáne Japonııa osy aıda úshjaqty jattyǵý ótkizedi

ASTANA. KAZINFORM — Ońtústik Koreıa, AQSh jáne Japonııa osy aıda Freedom Edge dep atalatyn úshjaqty jattyǵý ótkizedi, dep habarlaıdy Yonhap.

Bul týraly juma kúni Ońtústik Koreıanyń Birikken shtaby (JCS) habarlady.

Bes kúndik oqý-jattyǵýlar 15-19 qyrkúıek aralyǵynda Ońtústik Koreıanyń Chedjý aralynyń shyǵysy men ońtústigindegi halyqaralyq sý aıdyndarynda ótedi.

— Úsh el teńiz, áýe jáne kıberkeńistik salalarynda ózderiniń kóp domendik operatsııalyq múmkindikterin nyǵaıtady jáne turaqty úshjaqty yntymaqtastyqty saqtaý úshin ózara árekettesýdi kúsheıtedi, — delingen JCS málimdemesinde.

JCS oqý-jattyǵýlar áýe qorǵanysy, súńgýir qaıyqtarǵa qarsy soǵys, qaraqshylyqpen kúres jáne kıberjattyǵýdy qosa alǵanda keń aýqymdy qamtıtynyn aıtty.

Ótken maýsymdaǵy alǵashqy jattyǵýlardan keıin Soltústik Koreıa olardy AQSh bastaǵan áskerı blokty nyǵaıtý áreketi dep synady.

— Bul jattyǵýlar Soltústik Koreıanyń ıadrolyq jáne zymyrandyq qaterlerine den qoıýǵa, sondaı-aq halyqaralyq quqyq pen erejelerdi saqtaı otyryp, aımaqtaǵy beıbitshilik pen turaqtylyqty qorǵaýǵa baǵyttalǵan jyl saıynǵy is-shara, — delingen habarlamada.

Buǵan deıin KHDR basshysy Ońtústik Koreıa men AQSh-tyń birlesken áskerı jattyǵýlaryn synap, olar Soltústik Koreıaǵa qarsy «dushpandyq» ustanymda degen pikir aıtqan bolatyn.