Ońtústik Koreıa 2035 jylǵa deıin tómen orbıtaly spýtnıktik baılanys jelisin qurady
ASTANA. KAZINFORM — Ońtústik Koreıa 2035 jylǵa deıin júzdegen jerserikten turatyn tómen orbıtaly spýtnıktik baılanys jelisin qurýdy josparlap otyr. Sonymen qatar el óziniń alǵashqy Aıǵa qoný mıssııasyn jedeldetip, ony bastapqy jospardan eki jyl buryn — 2030 jyly júzege asyrýdy kózdeıdi. Bul týraly Yonhap agenttigi habarlady.
Tıisti jospardy Koreıanyń aeroǵarysh agenttigi (KASA) Chındjý qalasynda ótken joǵary tehnologııalyq salalardy damytý jónindegi ashyq brıfıng barysynda tanystyrdy. Strategııany sol kúni Prezıdent Lı Chje Menniń tóraǵalyǵymen ótken Ulttyq ǵarysh keńesi bekitti.
Agenttiktiń málimetinshe, jańa joba eldiń spýtnık pen zymyran-tasyǵysh óndirisin damytýǵa serpin beredi. Osylaısha Ońtústik Koreıa SpaceX kompanııasynyń Starlink júıesine uqsas óz ulttyq spýtnıktik baılanys jelisin qalyptastyrýdy kózdep otyr.
KASA basshysy O The Soktyń aıtýynsha, qazirgi tańda jetekshi ǵarysh derjavalary ulttyq qaýipsizdik pen baılanys salasyndaǵy egemendikti qamtamasyz etý úshin, sondaı-aq bolashaqtaǵy 6G tehnologııalarynyń negizin qalyptastyrý maqsatynda tómen orbıtaly spýtnıktik jelilerdi damytýǵa basymdyq berip otyr.
Josparǵa sáıkes, 2035 jylǵa deıin orbıtaǵa 128-den 512-ge deıin spýtnık ushyrylady. Jobanyń bastapqy quny keminde 4 trıllıon vondy (shamamen 2,62 mıllıard AQSh dollary) quraıdy. Keıin bul baǵytqa ár bes jyl saıyn 13,2 trıllıon vonǵa deıin ınvestıtsııa salý josparlanǵan.
Sondaı-aq úkimet spýtnıkter arqyly jınalǵan derekterdi kommertsııalyq maqsatta satýmen aınalysatyn arnaıy birlesken kompanııa qurady. Ondaǵy úlestiń 70 paıyzdan astamy jeke sektorǵa tıesili bolady. Boljam boıynsha, bul kompanııanyń jyldyq tabysy 2034 jylǵa qaraı 1,7 mıllıard AQSh dollarynan asady.
Budan bólek, KASA Ońtústik Koreıanyń alǵashqy Aıǵa qoný mıssııasyn 2032 jyldan 2030 jylǵa aýystyrýdy josparlap otyr. Ol úshin jańa býyndaǵy zymyrandy kútpeı-aq, jeke sektor ázirleıtin shaǵyn qoný modýli úsh satyly «Nýrı» zymyranynyń kómegimen Aıǵa jiberiledi.
Sonymen qatar Ońtústik Koreıa 2029 jyly Aı orbıtasyna baılanys spýtnıgin, al 2031 jyly Jer men Aı arasyndaǵy ǵarysh keńistigin zertteıtin ǵylymı apparatty ushyrýdy josparlap otyr. Bul jobalar eldiń uzaq merzimdi Aıdy zertteý baǵdarlamasynyń negizin qalyptastyrýǵa baǵyttalǵan.
Eske sala keteıik, Ońtústik Koreıanyń burynǵy birinshi hanymy para alǵany úshin jeti jylǵa bas bostandyǵynan aıyryldy.
