Ońtústik Qazaqstanda jeke kún elektr stansasynyń sany 3,5 ese ósti
ASTANA.KAZINFORM - Ońtústik Qazaqstanda jeke kún generatsııasynyń qarqyndy ósimi baıqalady.
Energetıka mınıstrligi málimetinshe, kún stansalarynyń ıeleri 3,5 ese kóbeıip, tólem kólemi 200 mln teńgeden asty. Sońǵy kezderde kásipkerler men jeke tutynýshylar jeke kún stansalaryn ornatyp, ózderin elektr energııasymen qamtamasyz etip, artyǵyn jelige satyp otyr.
Buryn úlesi az bolǵan mıkrogeneratsııa modeli búginde eldiń jańa energetıkalyq júıesiniń mańyzdy bóligine aınalyp keledi. Sarapshylardyń aıtýynsha, taratylǵan energetıka — Qazaqstan energojúıesin jańǵyrtýdyń negizgi baǵyttarynyń biri sanalady.
Dástúrli júıede negizgi júkteme iri elektr stansalaryna tússe, jańa qurylym myńdaǵan shaǵyn generatsııa kózderine súıenedi. Bul tásil energııa balansyn ıkemdi etip, jazdyń ystyq mezgilinde júktemeni azaıtady, jeli ınfraqurylymynyń turaqtylyǵyn arttyrady jáne elektr sapasyn jaqsartady.
Eldiń ońtústiginde ósim aıqyn baıqalady. «Qazaqstandyq kommýnaldyq júıeleri» toby men Túrkistan oblysy men Shymkent qalasyna elektr energııasyn jetkizip, taratýmen aınalysatyn «Ońtústik Jaryq Tranzıt» kompanııasynyń derekterine sáıkes, 2025 jyly salada eleýli qurylymdyq ózgeris tirkelgen.
Mıkrogeneratsııanyń negizgi kórsetkishteri:
netto-tutynýshylar sany 22-den 78-ge deıin (qańtar-qarasha) ósti, bul 3,5 eseden astam ósimdi bildiredi.
Jeke kún elektr stansalarynyń ornatylǵan qýaty 2750 kVt-tan 7602 kVt-qa jetti.
2025 jyldyń qańtar-qazan aılarynda jelige berilgen kún energııasynyń kólemi 3,5 mln kVt·saǵ-tan asty, al 2024 jyly bul kórsetkish 910 727 kVt·saǵ bolǵan.
Kún elektr stansalary energııa qaýipsizdiginiń mańyzdy faktory bolyp, pıktik saǵattardaǵy jeli júktemesin tómendetip, ınfraqurylymnyń turaqtylyǵyn arttyrady. Qarjylyq kórsetkishter de bul modeldiń tıimdi ekenin dáleldedi.
«Ońtústik Jaryq Tranzıt» jelisine alǵashqy netto-tutynýshylarǵa 200 mln teńgeden astam tólem júrgizilgen, onyń shamamen 120 mln teńgesi 2025 jyldyń alǵashqy on aıynda berilgen. Bul bıznes úshin tikeleı tabys bolyp, kún stansalaryna salynǵan ınvestıtsııany jyldam óteýge, operatsııalyq shyǵyndardy azaıtýǵa jáne nysandardyń energııa tıimdiligin arttyrýǵa múmkindik beredi.
Qazirgi damý qarqyny saqtalsa, 2026 jyly «Ońtústik Jaryq Tranzıt» jelilerindegi netto-tutynýshylar sany 100-den asyp, kún stansalarynyń jalpy qýaty 10 MVt-qa jetedi. Bul jylyna 5 mln kVt·saǵ-tan astam taza energııa óndirýge múmkindik berip, derbes energetıkalyq nysan jumysyna teń kórsetkishti qamtamasyz etedi.
Aıta keteıik, Jańaózende qýaty 50 MVt kún elektr stansasy iske qosyldy.
Majar kompanııasy Qazaqstannyń birneshe óńirinde kún elektr stansasyn salady.
Qazaqstanda alǵash ret kún elektr stansasyn salýǵa aýktsıon ótti.