Ońtústik Qazaqstan pedagogıkalyq ýnıversıtetiniń rektory taǵaıyndaldy
ShYMKENT. KAZINFORM — Joǵary jáne joǵary oqý ornynan keıingi bilim berý uıymynyń Basqarma tóraǵasy — rektoryn saılaý (taǵaıyndaý) jónindegi respýblıkalyq komıssııanyń № 2 hattamasyna sáıkes, Ózbekáli Jánibekov atyndaǵy Ońtústik Qazaqstan pedagogıkalyq ýnıversıtetiniń rektory bolyp zań ǵylymdarynyń doktory, professor Qaırat Balabıev taǵaıyndaldy.
Qaırat Balabıev 1965 jyly Túrkistan oblysynyń Kentaý qalasynda dúnıege kelgen. Joǵary bilimdi. Ebineı Bóketov atyndaǵy Qaraǵandy memlekettik ýnıversıtetiniń zań fakýltetin «Quqyqtaný» mamandyǵy boıynsha, sondaı-aq Ońtústik Qazaqstan Ashyq ýnıversıtetin «Qarjy jáne nesıe» mamandyǵy boıynsha támamdaǵan.
Eńbek jolynda prokýratýra, ádilet organdary, joǵary bilim berý júıesi jáne memlekettik qyzmet salalarynda jaýapty laýazymdardy atqarǵan.
Ár jyldary burynǵy Ońtústik Qazaqstan oblystyq prokýratýrasynda, Shymkent qalasy men óńirlik prokýratýralarda, Ádilet basqarmasynda qyzmet atqaryp, Ońtústik Qazaqstan zań ınstıtýtynyń rektory boldy.
Sonymen qatar ǵylymı-pedagogıkalyq qyzmetpen aınalysyp, joǵary oqý oryndarynda professor retinde eńbek etken. 2016-2021 jyldary Túrkistan oblystyq máslıhatynyń VI shaqyrylymynyń hatshysy, 2021 jyldan VII shaqyrylymynyń hatshysy qyzmetterin atqardy. Keıin QR Parlamenti Májilisiniń depýtaty boldy.
Qaırat Balabıev — ákimshilik quqyq jáne memlekettik qyzmet salasyndaǵy ǵylymı eńbekterdiń avtory. Onyń «Qazaqstan Respýblıkasynyń ákimshilik-is júrgizý quqyǵy: jaǵdaıy men máseleleri» jáne «Qazaqstan Respýblıkasynda memlekettik qyzmettiń ákimshilik-quqyqtyq rettelýi: qalyptasýy jáne damý perspektıvalary» atty monografııalary ǵylymı qaýymdastyq tarapynan joǵary baǵalanǵan.
«Qurmet», «Parasat» ordenderimen, mereıtoılyq medaldarmen jáne «Ybyraı Altynsarın» tósbelgisimen marapattalǵan. Sonymen qatar «Qazaqstan máslıhattarynyń Qurmetti depýtaty» ataǵynyń ıegeri, Túrkistan oblysynyń, Shymkent jáne Kentaý qalalarynyń, Maqtaaral aýdanynyń Qurmetti azamaty.
Buǵan deıin Qazaqstan temir joly kompanııasynyń basqarma tóraǵasy taǵaıyndalǵany týraly habarlaǵan edik.
