Ońtústik aımaqtyń energetıkalyq áleýetin arttyrý joldary qaraldy
ASTANA. KAZINFORM — «KEGOC» AQ Basqarma tóraǵasynyń orynbasary Baqythan Jazyqbaev Jambyl oblysynyń ákimi Erbol Qarashókeevpen kezdesti.
Kezdesý barysynda Baqythan Medeǵalıuly óńir basshysyn Ońtústik aımaqtaǵy elektr energetıkasyn damytýǵa baǵyttalǵan kompanııanyń basty josparlarymen tanystyrdy.
Sondaı-aq, Baqythan Jazyqbaev Jambyl oblysy ákiminiń orynbasary jáne aýdandyq ákimderdiń qatysýmen ótken jer máselelerine arnalǵan keńeske qatysty.
Qazirgi ýaqytta KEGOC «Qazaqstan BEJ Ońtústik aımaǵynyń elektr jelisin salý» aýqymdy jobasyn júzege asyrýda. Joba aıasynda joǵary kerneýli jelilerdiń ótý máseleleri, sondaı-aq ony iske asyrýdyń ózge de tehnıkalyq aspektileri qarastyryldy. Osy oraıda aýdandyq ákimderge atalmysh jobanyń respýblıkalyq jáne ekonomıkalyq mańyzdylyǵy týraly jergilikti turǵyndarǵa jáne jer ıelerine túsindirý jumystaryn júrgizý tapsyryldy.
Іri ınvestıtsııalyq joba — Ońtústik óńirdiń jáne jalpy elimizdiń energetıkalyq júıesiniń turaqtylyǵyn arttyrýǵa jáne elektrmen jabdyqtaý senimdiligin kúsheıtýge múmkindik beretin bolady.
Joba aıasynda Jambyl elektr jelilerin nyǵaıtý, sondaı-aq uzyndyǵy 475 km bolatyn 500 kV «Shý–Jambyl–Shymkent» áýe jelisin salý, qosalqy stantsııalardy keńeıtý jáne 220 kV jelilerin jańartý kózdelip otyr.
Jıyn sońynda Baqythan Medeǵalıuly merdiger kompanııa ókilderimen kezdesip, joba boıynsha atqarylyp jatqan jumystardyń barysymen tanysty.