Ońtústik aımaqtarda aldaǵy vegetatsııa kezeńinde sý tapshy bolady – Úkimet dabyl qaqty

ASTANA. KAZINFORM – Búgin Úkimet otyrysynda eń aldymen kún tártibinen tys másele - elimizdiń ońtústik aımaqtaryn sýmen qamtamasyz etý jaıy qaraldy.

— Otyrystyń kún tártibinen tys aldaǵy vegetatsııa kezeńinde elimizdiń ońtústik aımaqtaryn sýmen qamtamasyz etý máselesin tyńdaımyz. Ótken aptada Qanat Aldabergenuly (Premer-mınıstrdiń orynbasary Bozymbaev) jáne Aýyl sharýashylyǵy, Sý resýrstary mınıstrlerimen birge ońtústik aımaqtarǵa baryp, jergilikti halyqpen birneshe kezdesý ótkizip, tıisti túsindirme bergen bolatyn, - dedi otyrysty ashqan Premer-mınıstr Oljas Bektenov.

Negizi másele boıynsha sóz alǵan Qanat Bozymbaev 4-5 jeltoqsan aralyǵynda Qyzylorda, Túrkistan jáne Jambyl oblystarynda Sý resýrstary mınıstrligi, Aýyl sharýashylyǵy mınıstrligi, oblys ákimdikteri, quqyq qorǵaý organdary, sý sharýashylyǵy uıymdary jáne sharýa qojalyqtary ókilderiniń qatysýymen kóshpeli keńester ótkizilgenin atap ótti.

— Úsh óńirde de sý az kezeńniń jalǵasyp jatqany rastaldy. Shardara sý qoımasyna sý kelýi 43 paıyzǵa tómendedi. Naryn-Syrdarııa kaskadyndaǵy iri sý qoımalardaǵy sý kólemi byltyrǵy jylmen salystyrǵanda 3,8 mlrd tekshe metrge kem. 2026 jylǵy vegetatsııaǵa boljamdy sý kelýi nebári 1-2 mlrd tekshe metr dep baǵalanyp otyr, bul 1 mlrd tekshe metrge deıin tapshylyq qaýpin týdyrady. Jambyl oblysynda sý qoımalardyń tolymdylyǵy bar bolǵany 41 paıyzdy quraıdy. Kırov jáne Teris-Aşybulaq sý qoımalaryn jobalyq deńgeıge deıin tolmaý qaýpi bar, - dedi ol.

Vıtse-premer birqatar oblysta 2025 jyly ylǵalsúıgish daqyldardy qysqartý jónindegi josparly kórsetkishter oryndalmaǵanyn atap ótti.

— Degenmen, sýdy únemdeý boıynsha oń dınamıka saqtalýda: sý únemdeý tehnologııalary qoldanylatyn alań 543,5 myń gektardan asty, jyl saıynǵy ósim shamamen 150 myń gektardy quraıdy. Memlekettik qoldaý aıtarlyqtaı kúsheıtildi. 2026-2028 jyldarǵa arnalǵan bıýdjette 228,1 mlrd teńge qarastyrylǵan, onyń ishinde 214,6 mlrd teńge — ınvestıtsııalyq sýbsıdııalar, - dedi Qanat Bozymbaev.

Buǵan deıin sý tasqyny kezeńine daıyndyq aıasynda elimizde 69 gıdrotehnıkalyq nysan jóndelip jatqanyn jazǵanbyz.