Ońtústik Amerıka fýtbolynda qandy qaqtyǵys boldy

ASTANA. KAZINFORM — Ońtústik Amerıka kýbogi aıasyndaǵy Argentınanyń «Independente» men Chılıdiń «Ýnıversıdad» klýbtary arasyndaǵy match jankúıerler arasyndaǵy daýdan keıin esepke alynbaıtyn boldy, dep habarlaıdy The Sun. 

Komandalar Býenos-Aırestegi «Lıbertadores de Amerıka» stadıonynda oınap, 1:1 esebimen teń tústi. Tóbeles ekinshi taımnyń basynda Ýnıversıdad jankúıerleri alań ıeleriniń jankúıerlerine zattardy laqtyra bastaǵan kezde bastaldy. Baqylaýdy joǵaltqan polıtsııa qyzmetkerleri tipti jarylǵysh zattardy qoldanýǵa májbúr boldy. Tártipsizdik saldarynan 3 adamnyń qaza tapqany, 10 kórermenniń aýyr jaraqat alǵany jáne chılılik 90 jankúıerdiń qamaýǵa alynǵany habarlandy.

Basylymnyń habarlaýynsha, qandy tóbelesten keıin match tolyǵymen toqtatyldy. CONMEBOL men «Independente» muny resmı túrde rastady. Ońtústik Amerıka fýtbol konfederatsııasy da tártiptik sharalar qoldanylýy múmkin ekenin aıtty.
Jaǵdaıǵa Chılı prezıdenti Gabrıel Borıch te aralasty. Ol oqıǵaǵa qatysty málimdeme jasady.

— Avellaneda qalasyndaǵy «Independente» men «Ýnıversıdad» jankúıerleri arasynda bolǵan oqıǵa kóp jaǵynan múldem durys emes. Jankúıerler arasyndaǵy zorlyq-zombylyq pen uıymdastyrýshylardyń salǵyrttyǵyn aqtaýǵa bolmaıdy. Ádilet úshin bul jaǵdaıǵa kinálilerdi anyqtaý kerek. Bizdiń qazirgi basymdyq — shabýylǵa ushyraǵan azamattarymyzdyń jaǵdaıyn anyqtaý, olarǵa shuǵyl medıtsınalyq kómek kórsetý jáne tutqyndalǵandardyń quqyǵyn qorǵaý, — dedi Chılı basshysy.

Prezıdent sondaı-aq óz azamattarynyń jaǵdaıyn bilýge ýáde berdi.

— Men Argentınadaǵy elshimiz Hose Antonıo Vıera-Galloǵa tapsyrma berdim. «Ýnıversıdad» jankúıerleri tutqyndalǵan polıtsııa bólimi men jaralanǵandar emdelip jatqan aýrýhanaǵa barady. Biz azamattarymyzdyń qaýipsizdigin qamtamasyz etý úshin jumys istep jatyrmyz, — dedi ol.

Eske sala keteıik, brazılııalyq qaqpashy oıyn sany boıynsha rekord ornatqany jaıly jazǵan edik.