Ońtústik Altaıda alǵash ret ilbiske spýtnıktik qarǵybaý ornatyldy
ASTANA. KAZINFORM — Katonqaraǵaı memlekettik ulttyq tabıǵı parkinde Qazaqstannyń Qyzyl kitabyna engen ilbiske spýtnıktik qarǵybaý ornatyldy. Ońtústik Altaıda alǵash ret júrgizilgen bul jumys sátti aıaqtaldy. Іlbiske «Altaı» degen at berildi.
Spýtnıktik qarǵybaý arqyly mamandar Altaıdyń qaı baǵytta júretinin, qandaı aýmaqtardy mekendeıtinin jáne qanshalyqty alysqa qozǵalatynyn baqylaıdy. Bul málimetter ilbistiń tirshiligin zerttep, ony qorǵaý jumystaryn josparlaý úshin qajet.
Іlbis kóbine adam bara bermeıtin bıik taýlarda tirshilik etedi. Ony tabıǵı ortasynda baqylaý qıyn bolǵandyqtan, spýtnıktik qurylǵy zertteýshilerge janýardyń qozǵalysy týraly naqty derekter alýǵa múmkindik beredi.
16 qazanda Erevanda ótken COP17 sammıtinde Prezıdent Qasym-Jomart Toqaev Qazaqstandaǵy ilbistiń sany shamamen 190 daraqqa jetkenin atap ótti. Prezıdent buǵan tabıǵatty qorǵaý jáne ǵylymı baqylaý jumystarynyń nátıjesinde qol jetkizilgenin aıtty.
— Qarǵybaýdy ornatýǵa Katonqaraǵaı ulttyq parkiniń qyzmetkerleri E. Qasymov, J. Amanbaev jáne Zoologııa ınstıtýtynyń mamandary A. Grachev, M. Bespalov, S. Bespalov, S. Saparbaev qatysty. Atalǵan jumys Pernod Ricard Kazakhstan kompanııasynyń qoldaýymen júzege asyrylyp jatyr, — delingen habarlamada.
Aldaǵy ýaqytta spýtnıkten alynǵan málimetter negizinde Altaıdyń júretin joldary men mekendeıtin aýmaqtary zertteledi. Bul Ońtústik Altaıdaǵy qar barysyn qorǵaý úshin qajet aqparatty tolyqtyrýǵa kómektesedi.
Eske salaıyq, buǵan deıin Almaty mańynda týrıster ilbisti kezdestirgenin jazǵanbyz.
