Ońtústik Afrıkada ótken G20 sammıtinde qandaı máseleler talqylandy
ASTANA. KAZINFORM – «Jıyrmalyq toptyń» sammıti 22-23 qarasha kúnderi OAR-dyń Iohannesbýrg qalasynda «Yntymaq, teńdik jáne turaqty damý» uranymen ótti, dep habarlaıdy Anadolu.
Lıderler jahandyq ekonomıkalyq óndiristiń 85%-yn, álemdik saýdanyń 75%-yn jáne Jer turǵyndarynyń úshten ekisin qamtıtyn G20 elderiniń bolashaǵyn aıqyndaıtyn reformalardy talqylaý úshin úsh sessııadan turatyn kezdesý ótkizdi.
Birinshi sessııada jahandyq qarjy jáne ekonomıkalyq júıeni nyǵaıtý, álemdik retsessııa men protektsıonızmniń aldyn alý, sondaı-aq turaqty ósimge kóshý máseleleri qaraldy.
Ekinshi sessııada apat qaýpin azaıtý, klımattyń ózgerýimen kúres, ádiletti energetıkalyq ótpeli kezeńdi qamtamasyz etý jáne azyq-túlik júıelerin kúsheıtý taqyryptary talqylandy. Sessııa aıaqtalǵannan keıin memleket basshylary beıresmı keshki as kezinde pikir almasty.
Úshinshi sessııa álemdik ekonomıka úshin asa mańyzdy mıneraldardy óndirý jáne saýdalaý, sondaı-aq jasandy ıntellektini retteý máselelerine arnaldy.
Sammıtke Túrkııa Prezıdenti Rejep Taıyp Erdoǵan, Frantsııa Prezıdenti Emmanýel Makron, Úndistan Premer-mınıstri Narendra Modı, Germanııa Kantsleri Frıdrıh Merts, Ulybrıtanııa Premer-mınıstri Kır Starmer, Brazılııa Prezıdenti Lýla da Sılva, Italııa Premer-mınıstri Djordja Melonı, Japonııa Premer-mınıstri Takaıtı Sanae, Kanada Premer-mınıstri Mark Karnı, Avstralııa Premer-mınıstri Entonı Albaneze, Eýropalyq keńes tóraǵasy Antonıý Koshta, Eýropalyq komıssııa tóraǵasy Ýrsýla fon der Lıaıen jáne BUU Bas hatshysy Antonıý Gýterrısh qatysty.
Iohannesbýrg sammıtiniń mańyzdy nátıjeleriniń biri – AQSh-tyń qarsylyǵyna qaramastan, G20 kóshbasshylarynyń qorytyndy kommıýnıke qabyldaýy boldy.
AQSh Prezıdenti Donald Tramp sammıtke qatysýdan bas tartyp, muny Ońtústik Afrıkada «aq násilge qatysty kemsitýshilik» jasalýymen túsindirdi.
Qorytyndy qujatta qarýly qaqtyǵystardy toqtatý qajettiligi, klımatpen kúres sharalaryn qarjylandyrýdy arttyrý jáne Afrıkanyń damý basymdyqtaryn jahandyq kún tártibiniń aldyńǵy qataryna shyǵarý qajettiligi atap ótildi.
Palestına máselesi alǵash ret ózge qaqtyǵystarmen bir qatarda kórsetildi. Sondaı-aq G20 Parıj kelisiminiń maqsattaryn rastady jáne damýshy elderge klımat baǵytyndaǵy kúsh-jigerin qoldaý úshin trıllıondaǵan dollar ınvestıtsııa qajet ekenin málimdedi.
«Jıyrmalyq top» – 19 el men eki óńirlik uıymdy (Eýropalyq odaq jáne Afrıka odaǵy) biriktiretin forým. G20 quramyna Argentına, Avstralııa, Brazılııa, Ulybrıtanııa, Germanııa, Úndistan, Indonezııa, Italııa, Kanada, Qytaı, Meksıka, Reseı, Saýd Arabııasy, AQSh, Túrkııa, Frantsııa, OAR, Ońtústik Koreıa, Japonııa, sondaı-aq EO men Afrıka odaǵy kiredi.
Materıal Anadolu agenttigi tarapynan Kazinform úshin arnaıy usynyldy.
Eske salaıyq, buǵan deıin Iohannesbýrgte OAR Prezıdenti Sırıl Ramafosa tóraǵalyǵymen G20 sammıtiniń bastalǵany habarlanǵan edi. Sonymen qatar G20 elderi mıllıarderleriniń tabysy bir jylda $2,2 trln-ǵa artqany týraly habarlaǵan bolatynbyz.