Ońtústik Afrıkada birneshe kóliktiń soqtyǵysýynan keminde 21 adam qaza tapty

Jol-kólik oqıǵasy jeksenbige qaraǵan túni Prıns-Albert pen Leý-Gamka shaǵyn qalalarynyń arasynda bolǵan. Bul aýmaq Keıptaýnnan shamamen 380 shaqyrym shyǵysqa qaraı ornalasqan.

Ulttyq jol qozǵalysyn basqarý korporatsııasynyń (RTMC) málimetinshe, apatqa eki shaǵyn avtobýs pen jol talǵamaıtyn kólik qatysqan. Polıtsııa ókili Krıstofer Spaıstyń aıtýynsha, eki Toyota shaǵyn avtobýsy mańdaısha soqtyǵysqan, keıin olarǵa Suzuki jol talǵamaıtyn kóligi kelip soǵylǵan.

Oqıǵa ornynda 18 adam qaza bolǵany anyqtaldy. Aýrýhanaǵa jetkizilgen taǵy úsh adam kóz jumyp, qaza tapqandar sany 21-ge jetti. Taǵy tórt adam aýyr jaraqatpen aýrýhanaǵa jetkizildi.

RTMC qaza bolǵandar sany artýy múmkin ekenin eskertti. Qazir Batys Keıp provıntsııasyndaǵy jedel qyzmetter men tıisti organdar oqıǵa ornyn tekserip jatyr.

Apat bolǵan jerde №1 tasjoly jabyldy. Polıtsııa adam ólimine ákep soqqan abaısyzdyq faktisi boıynsha qylmystyq is qozǵady. Jol apatynyń naqty sebebi ázirge anyqtalǵan joq. Oqıǵa ornynda RTMC tergeýshileri de jumys istep jatyr.

Batys Keıp provıntsııasyndaǵy bul apat demalys kúnderi Ońtústik Afrıkada bolǵan adam ólimine ákelgen eki iri jol-kólik oqıǵasynyń biri boldy. Úkimettiń málimetinshe, eki apattan keminde 29 adam qaza tapqan.

Ekinshi jol apaty jeksenbi kúni tańerteń Mpýmalanga provıntsııasyndaǵy Ermelo qalasynyń mańynda bolyp, segiz adamnyń ómirin qıdy.

Shaǵyn avtobýstar Ońtústik Afrıkada mıllıondaǵan adam úshin qoǵamdyq kóliktiń negizgi túri sanalady. Alaıda mundaı kólikterdiń qatysýymen adam ólimine ákeletin jol apattary jıi bolyp turady. Qańtarda shaǵyn avtobýstar qatysqan eki bólek apattan keminde 25 adam, onyń ishinde 14 bala qaza tapqan.

Aıta keteıik, buǵan deıin Aqmola oblysynda jol apatynan «Gazel» jolaýshysy qaza tapqanyn jazdyq. 

Al Almaty oblysynda jol apatynan eki jaıaý júrginshi mert boldy.