Ońtústik Afrıkada 90 oqýshy kannabıs qosylǵan keks jep aýrýhanaǵa tústi

Ońtústik Afrıka Respýblıkasynda Pulamadibogo Primary School bastaýysh mektebiniń 90 oqýshysy, boljam boıynsha, kannabıs qosylǵan keksti jegennen keıin aýrýhanaǵa túsken. QazAqparat bul týraly VVS jańalyqtaryna silteme jasap habarlaıdy.

Resmı derek boıynsha, oqýshylar mektepke bara jatqan jolda kóshedegi saýdagerden keks satyp alǵan.

Balalar júregi aınyp, ishi aýyryp, qusqysy kelgenin aıtty, al úsh qyz áli de aýrýhanada jatyr.

Polıtsııa eki kúdiktini ustady, olarǵa kisi óltirýge oqtaldy degen aıyp taǵyldy.

Polıtsııa habarlaýynsha, 21 jáne 19 jastaǵy kúdiktiler juma kúni Soshangývedegi sot aldynda jaýap beredi.

Gaýteng provıntsııasynyń Bilim departamenti muǵalimder synyptaǵy oqýshylardyń «birtúrli áreketin» baıqaǵannan keıin jedel járdem shaqyrǵanyn aıtty.

«Olardyń bári jaqyn mańdaǵy medıtsına mekemelerine jiberildi. 87 bala úıine qaıtaryldy, úsh oqýshy aýrýhanada qaldy, olar áli em alyp jatyr», — delingen bilim departamentiniń málimdemesinde.

Buǵan deıin de «space cookies» (kannabıs qosylǵan pechene) jegen balalar bir ýaqytta aýrýhanaǵa túsip, Demokratııa alıansy (DA) kóshe saýdagerlerine tekseristi kúsheıtýge shaqyrǵan.

Partııanyń resmı ókili Hýme Ramýlıfo da provıntsııa úkimetinen mekteptegi qaýipsizdik sharalaryn kúsheıtýdi talap etetinin málim etti.