Ońtústik Afrıka Respýblıkasynda bolǵan atys saldarynan toǵyz adam qaza tapty

ASTANA. KAZINFORM — Ońtústik Afrıka Respýblıkasynyń polıtsııasy Iohannesbýrgten 40 shaqyrym qashyqtyqta ornalasqan Bekkersdale eldi mekenindegi tavernada bolǵan atystan keıin kúdiktilerdi izdestirip jatyr. Qarýly shabýyl saldarynan toǵyz adam qaza taýyp, taǵy 10 adam jaraqat aldy, dep habarlaıdy BBC.

Polıtsııanyń málimetinshe, shamamen on shaqty belgisiz adam eki avtokólikpen kelip, ishimdik ishetin orynǵa jınalǵan adamdarǵa oq jaýdyrǵan. Keıin olar kóshede de retsiz oq atyp, oqıǵa ornynan boı tasalaǵan.

Bul — Ońtústik Afrıka Respýblıkasynda osy aıda tirkelgen ekinshi jappaı atys oqıǵasy.

Jeltoqsan aıynyń basynda Pretorııanyń batys bóligindegi Solsvıll aýdanynda ornalasqan barda bolǵan atys kezinde keminde 11 adam, onyń ishinde úsh jasar bala qaza tapqan edi.

Ońtústik Afrıka Respýblıkasynda adam óltirý deńgeıi álemdegi eń joǵary kórsetkishterdiń biri sanalady, 100 myń turǵynǵa shaqqanda 45 adam. Bıyl sáýir men qyrkúıek aralyǵynda elde táýligine orta eseppen 63 adam qaza tapqan.

Eske salaıyq, buǵan deıin Ońtústik Afrıka Respýblıkasy AQSh prezıdentiniń eldi 2026 jylǵy jeltoqsanda Maıamı qalasynda ótetin G20 sammıtine shaqyrmaıtyny jónindegi málimdemesine qatań jaýap qatqan bolatyn. El prezıdenti Sırıl Ramafosa OAR-dy «egemen, demokratııalyq, konstıtýtsııalyq memleket» dep atap, ózine qatysty «qorlaýdy» qabyldamaıtynyn málimdedi.

26 qarashada AQSh prezıdenti Donald Tramp Truth Social áleýmettik jelisinde Ońtústik Afrıka úkimetin afrıkanerler men eýropalyq qonystanýshylardyń urpaqtaryna qatysty adam quqyqtarynyń buzylýy máselesin sheshýden bas tartyp otyr dep aıyptaǵan edi.