Ońtústik Afrıka bıligi zańsyz mıgratsııany aýyzdyqtaýdyń bes tarmaqty josparyn usyndy
ASTANA. KAZINFORM – Ońtústik Afrıka Respýblıkasynyń prezıdenti Sırıl Ramafosa zańsyz kóshi-qonǵa kúres josparyn usynyp, halyqqa úndeý tastady, dep habarlaıdy VVS.
Bul málimdeme ımmıgranttarǵa qarsy kóńil-kúıdiń artýy, narazylyq sherýleriniń ótýi jáne elde jumyssyzdyqtyń joǵary deńgeıi aıasynda jasaldy.
Negizgi sharalarǵa zańsyz mıgranttardy jaldaıtyn jumys berýshilerdi qylmystyq jaýapkershilikke tartý, deportatsııany jedeldetý úshin mamandandyrylǵan sottardy qurý, sondaı-aq jeke málimetterdi urlaýmen kúresý úshin barlyq turǵyndardyń bıometrııalyq tizilimin jasaý kiredi. Budan basqa, shekaralyq baqylaýdy kúsheıtý, ımmıgratsııalyq júıedegi sybaılas jemqorlyqpen kúresý jáne ımmıgratsııalyq zańdardaǵy olqylyqtardy joıý josparlanyp otyr.
Ramafosa sonymen qatar azamattardy sotsyz jazalaýdan abaı bolýdy eskertti.
– Zańdy buzýdyń aldyn alýǵa tek ýákiletti memlekettik organdar ǵana quqyly. Kóshedegi adamdardy toqtatyp, azamattyǵyn rastaıtyn qujattardy talap etýge basqa eshkimniń quqyǵy joq, - dedi OAR prezıdenti.
Keıingi aptalarda eldegi shıelenis kúsheıip keledi: ımmıgranttarǵa qarsy toptar zańsyz mıgranttardyń OAR-dan 30 maýsymǵa deıin ketýin talap etti. Batys Keıp provıntsııasynda júzdegen mıgrant qorqytý tolqyny jáne Mozambıktiń eki azamatynyń óliminen keıin úılerinen qashýǵa májbúr boldy. Birneshe afrıkalyq el óz azamattaryn elden evakýatsııalaı bastady.
Resmı derekterge sáıkes, OAR-da úsh mıllıonnan astam sheteldik azamat turady - bul halyqtyń shamamen 5%-y, alaıda zańsyz ımmıgranttardy qosqanda naqty sany aıtarlyqtaı kóp. Ótken jyly shekara qyzmetkerleri elge zańsyz kirýge tyrysqan 450 myńnan astam adamdy ustady.
Ońtústik Afrıkada jumyssyzdyq deńgeıi shamamen 33%-dy quraıdy – bul negizinen jastarǵa áser etip otyrǵan álemdegi eń joǵary kórsetkishterdiń biri, Ramafosa zańsyz kóshi-qon memlekettik qyzmetterge qosymsha kúsh túsirip jatqanyn moıyndap, jańa sharalardy túsindirý úshin kórshiles Afrıka elderine arnaıy ókilder jiberýge ýáde berdi.
Osyǵan deıin Ońtústik Afrıkanyń ulttyq parkinde joǵalyp ketken eki týrıstiń denesi tabylǵanyn jazdyq.
