Ońtústiktiń jastaryn bir kúnge aýylǵa alyp bardy

ShYMKENT. QazAqparat - Ońtústik Qazaqstan oblysynda Otyrar aýdany ákimdigi men Oblystyq jastar resýrstyq ortalyǵy jastar arasynda «Aýyldaǵy bir kúnim» jobasyn uıymdastyrýda. «Salt-dástúr - ulttyq rýhtyń negizi» taqyrybymen qolǵa alynǵa jobaǵa qatysýshylar kıeli Otyrar aýdanyna keldi, dep habarlaıdy QazAqparat HAA tilshisi.    

Qonaqjaılylyq ádetinen tanbaǵan otyrarlyqtar jastardy aýdanǵa kire beristegi qaqpa aldynan qarsy alyp, qurmet kórsetti. 

 

Elbasy N.Nazarbaevtyń «Bolashaqqa baǵdar: rýhanı jańǵyrý» maqalasyn júzege asyrý maqsatynda uıymdastyrylǵan jobaǵa qatysýshylardy aýdan ákimi Erlan Aıtahanov kútip aldy. Jastar birden aýdan ortalyǵyndaǵy Ábý Nasyr ál-Farabı  atyndaǵy rýhanııat mýzeıine baryp, ejelgi Otyrardyń tarıhyn tanyp bildi. Mýzeıdi aralap shyqqan soń odan ári kóne Otyrar tarıhynan syr shertetin Otyrar tóbege kelip toqtady. Munda jastar ejelgi Otyrar qalasynyń mádenıeti men salt-dástúri, ádet-ǵurpy jaıynda tanyp bilip, rýhanı qundylyqtarymyz týraly keńinen maǵlumat aldy. Keıinnen Arystanbab kesenesine zııarat jasaǵan jastar, oblys kóleminde alǵash ashylǵan Qaraqońyr aýyldyq okrýgindegi «Alash» etnoaýylyna at basyn burdy. Onda jastar keńpeıil aýyl jurtynyń meıirimge toly júzderi men ystyq yqylasyna bólenip, darhan dala aıasynda arqany keńge saldy. Aýyldyń bir sáttik ómirin kóz aldarynda elestetkendeı boldy. Jastar munda otyrarlyq qolóner sheberleriniń týyndylarymen tanysyp, atqa mindi, altybaqan tepti. Kún bata alty qanatty kıiz úıde aq dastarhan jaıylyp, qonaqtarǵa as berildi. Jastardy árdaıym qoldaýǵa daıyn ekenin aıtqan aýdan ákimi Erlan Aıtahanov jobanyń mańyzdylyǵyna toqtaldy.

 

«Elbasy Nursultan Nazarbaev «Bolashaqqa baǵdar: rýhanı jańǵyrý» atty maqalasynda «Ájepteýir jańǵyrǵan qoǵamnyń óziniń tamyry tarıhynyń tereńinen bastaý alatyn rýhanı kody bolady. Jańa turpatty jańǵyrýdyń eń basty sharty - sol ulttyq kodyńdy saqtaı bilý», - degen bolatyn. Ulttyq kod degenimiz ne? Qazaqy qalyp, ulttyq mádenıet, salt-dástúr jáne ulttyq bolmys. Ulttyq dástúrdiń de ozyǵyn alyp, tozyǵyn qaldyrý. Eger jańǵyrý eldiń ulttyq-rýhanı tamyrynan nár almasa, ol adasýǵa bastaıdy. Adaspaý úshin qazaqqa qajetti tabıǵı bolmysty saqtaı bilý kerek. Órkenıet kóshinen de qalýǵa bolmaıdy. Kóshke ilese otyryp, qanymyzda bar qasıetterdi qaıta túletýimiz kerek»,- dedi  Erlan Aıtahanov.

 

Keshkisin jastyqtyń jalyny qaınaǵan jastar tabıǵat aıasynda alaý jaǵyp, ándetip, dýmandatyp, aýyl keshiniń kórkin qyzdyrdy.