Ońtústiktiń ónerpazdary túrkııalyqtardy tánti etti
Atalǵan delegattardyń top jetekshilerimen Óńirlik kommýnıkatsııalar qyzmetinde baspasóz konferentsııasy uıymdastyryldy.
Baspasóz konferentsııasyna qatysqan oblystyq mádenıet basqarmasynyń mádenıet jáne óner bóliminiń basshysy Ǵ. Sharafıeva, Sh.Qaldaıaqov atyndaǵy oblystyq fılarmonııa ártisi S.Ábdiraıymova, oblystyq opera jáne balet teatrynyń dırektory Á. Nurmahanbetov baýyrlas el ystyq yqylaspen qarsy alǵandaryn aıtyp, óz áserlerimen bólisti.
«Qazaqstannyń Túrkııadaǵy elshiligi Kechıóren mýnıtsıpalıteti men Ońtústik Qazaqstan oblysy ákimdiginiń uıymdastyrýymen «Bolashaqqa baǵdar: rýhanı jańǵyrý» baǵdarlamasy jáne Qazaqstan men Túrkııa arasyndaǵy dıplomatııalyq qarym-qatynastardyń 25 jyldyǵy aıasynda uıymdastyrylǵan qos el arasyndaǵy mádenı baılanys Ankara, Adana, Mersın, Ystanbul qalalarynda keń kólemdi kontserttik baǵdarlamamen erekshelendi»,- dedi Ǵ. Sharafıeva.
Baýyrlas elder arasyndaǵy qarym-qatynasty nyǵaıtý, ortaq mádenıetti qalyptastyra otyryp, ádebı, rýhanı qundylyqtardy dáripteý maqsatynda qolǵa alynǵan aıtýly sharada óner kórsetken el ónerpazdaryna Qazaqstannyń Túrkııadaǵy Elshiligi jáne atalǵan memlekettiń mádenıet basshylary aıryqsha qoldaý bildirip, alǵystaryn jetkizdi.
«Kúni búginge deıin kúngeı ólkeniń mádenıet maıshamyn mazdatyp, dańqty eldiń dara ónerin respýblıkalyq, halyqaralyq sahna tórinde tanytqan ánniń darabozdary, bıdiń tusaý saldyrmas tarlandary túrkııalyq kórermenniń shattyq shapalaǵyna kómilse, qazaqtyń qara dombyrasyn kúmbirletip ata ánin jatyq notada órgen dástúrli ánshiler eldiń ulttyq áýenderin áýeletip, tarıhı mánge toly gastroldik saparda aıryqsha iz qaldyrdy. Onyń dáleli, Túrkııa memleketiniń aqparat betterinde eldiń sálemin arqalaı barǵan Ońtústik ónerpazdarynyń jarqyn beıneleri kórinis tabýy bolatyn»,-dep atap ótti Á.Nurmahanbetov.
Sonymen qatar, VIII «Halyqaralyq Ramazan» festıvali aıasynda Túrkııanyń bas qalasy - Ankaranyń Kechıóren aýdanynda jyr alyby Jambyl Jabaev atyndaǵy kósheniń saltanatty ashylý rásimi de jyldyń aıryqsha jańalyǵy retinde oryn aldy.
Brıfıng barysynda Sh.Qaldaıaqov atyndaǵy oblystyq fılarmonııa ártisi S.Ábdiraıymova sapardyń sátti qadamdary men «Qazaqstan keshi» kontserti týraly aıtty.
Brıfıng sońynda spıkerler aptalyq sapar sheberlikti shyńdaý men mádenı qarym-qatynastyń nyǵaıýyna erekshe áser beretindigin aıtyp, Elbasy maqalasy aıasynda júzege asqan qos el arasyndaǵy eńseli joba jalǵasyn tabatyndyǵyn jetkizdi.
